Maturantët në të gjithë vendin nisin sot plotësimin e formularit A2 në portalin U-Albania, duke hapur kështu fazën e aplikimeve për universitetet.
Çdo maturant ka të drejtë të përzgjedhë deri në 10 programe studimi, sipas rendit të preferencave.
Përpara aplikimit, të rinjtë duhet të kryejnë pagesën prej 2 mijë lekësh në një bankë të nivelit të dytë.
Për herë të parë këtë vit, fatura e pagesës mund të ngarkohet online drejtpërdrejt në platformën U-Albania, duke shmangur procedurat shtesë me dokumentacionin fizik.
Oferta akademike pritet të zgjerohet edhe me programe të reja studimi.
Deri më tani, universitetet kanë propozuar rreth 60 programe të reja, të cilat pritet të bëhen pjesë e ofertës për vitin e ri akademik.
Megjithatë, konkurrenca pritet të mbetet e fortë për degët më të kërkuara, ku kuotat mund të plotësohen që në raundin e parë të pranimeve.
Pas shpalljes së fituesve dhe regjistrimit në një program studimi, maturantët do të kenë të drejtë të çregjistrohen për dy ditë në fund të çdo raundi, në rast se dëshirojnë të ndjekin një alternativë tjetër.
Procesi i aplikimit përmes formularit A2 do të zgjasë gjashtë ditë dhe do të mbyllet më 1 gusht.
