Disa fluturime të kompanisë ajrore Emirates që kishin si destinacion Dubain janë detyruar të kthehen pas një sulmi me dron që çoi në mbylljen e përkohshme të aeroportit ndërkombëtar të qytetit.
Sipas Financial Times, fluturimet që ishin nisur nga Manchester, Edinburgh dhe Dublin u detyruan të ndryshonin itinerarin dhe të ktheheshin pasi aeroporti i Dubait u mbyll për arsye sigurie. Incidenti vjen në një moment kur trafiku ajror në rajon kishte nisur të rikuperohej gradualisht pas tensioneve të fundit në Lindjen e Mesme.
Aeroporti u mbyll për një periudhë të shkurtër kohe pasi një dron goditi zonën e aeroportit, duke shkaktuar një zjarr në afërsi të pistave. Pamjet nga vendi i ngjarjes tregojnë një avion Airbus A350 të Emirates që përgatitej për ulje ndërsa në sfond shihej tymi nga zjarri në aeroport.
Megjithatë, pavarësisht incidentit, trafiku ajror kishte nisur të rritej në ditët e fundit. Të dhënat tregojnë se të dielën kompania Emirates realizoi numrin më të lartë të fluturimeve që nga fillimi i luftës me Iranin, duke operuar 369 fluturime, rreth 70 për qind e nivelit që kishte para konfliktit.
Edhe kompania Etihad Airways, e cila operon nga Abu Dhabi, kaloi për herë të parë shifrën e 100 fluturimeve në ditë të dielën, sipas të dhënave të platformës së monitorimit të trafikut ajror Flightradar24.
Ndërkohë Qatar Airways ka njoftuar se planifikon të rrisë numrin e fluturimeve duke nisur nga e mërkura, edhe pse hapësira ajrore e Katarit vazhdon të përballet me kufizime për shkak të situatës së sigurisë në rajon.
Sulmi me dron dhe ndërprerjet e fluturimeve tregojnë se tensionet në Lindjen e Mesme vazhdojnë të ndikojnë drejtpërdrejt në trafikun ajror dhe në funksionimin e një prej nyjeve më të rëndësishme të aviacionit në botë, siç është Dubai.
