Qeveria greke ka ndërmarrë një hap të ri për të forcuar mbrojtjen e konsumatorëve në tregun bankar, duke propozuar një ligj që vendos kufi për shumën totale që qytetarët duhet të kthejnë për kreditë konsumatore deri në 100 mijë euro.
Plani u prezantua nga Kryeministri i Greqisë, Kyriakos Mitsotakis, i cili theksoi nevojën për të frenuar praktikat abuzive dhe kushtet e paqarta në kontratat e huadhënies.
Sipas propozimit, shuma totale që një huamarrës do të paguajë, përfshirë interesat dhe tarifat, nuk do të mund të kalojë nga 30% deri në 50% mbi kapitalin e marrë. Kjo masë prek kryesisht kreditë konsumatore pa kolateral dhe borxhet nga kartat e kreditit, segmente ku janë evidentuar norma të larta interesi dhe tarifa të ndërlikuara.
Reforma parashikon edhe një periudhë reflektimi prej 14 ditësh nga momenti i nënshkrimit të kontratës, duke rritur transparencën dhe duke i dhënë qytetarëve më shumë kohë për të rishqyrtuar vendimet financiare.
Nisma vjen në një moment kur tregu i kredive konsumatore në Greqi është në rimëkëmbje, por me kosto ende të larta për qytetarët. Normat e interesit shpesh kalojnë 10% për kreditë konsumatore dhe mbi 14% për kartat e kreditit, duke rritur rrezikun e mbingarkesës me borxhe, veçanërisht për familjet më të cenueshme.
Kjo ndërhyrje është pjesë e një presioni më të gjerë ndaj bankave për të rritur transparencën dhe për të ulur barrën mbi konsumatorët, në një treg ku vitet e fundit janë evidentuar tarifa të paqarta dhe konkurrencë e kufizuar.
Ndërkohë, zhvillimet në Greqi vijnë në kontrast me situatën në Shqipëri, ku pas skandalit të mikrokredive po vërehet një rilindje e institucioneve të mikrofinancës dhe rikthimi i praktikave që më herët janë kritikuar si abuzive.
Sipas ankesave të qytetarëve, të cilat kanë nisur të shtohen sërish, këto institucione po aplikojnë tarifa të larta, kushte të paqarta dhe metoda që rëndojnë ndjeshëm kredimarrësit, duke rikthyer shqetësimet për zhvatje financiare dhe mungesë mbrojtjeje efektive të konsumatorit. /skyweb.al
