Mijëra fluturime janë anuluar në mbarë botën gjatë muajit maj, ndërsa kompanitë ajrore kanë nisur të shkurtojnë ndjeshëm kapacitetet për shkak të mungesës së karburantit për avionë, duke rritur rrezikun për ndërprerje të udhëtimeve, sidomos për familjet që kanë planifikuar pushimet në fund të pranverës.
Sipas të dhënave të kompanisë së analizës së aviacionit Cirium, rreth 13 mijë fluturime të planifikuara për majin janë anuluar, ndërsa vetëm në dy javët e fundit të prillit janë hequr nga oraret afro 2 milionë vende për pasagjerë.
Të dhënat tregojnë se numri total i vendeve të disponueshme globalisht ka rënë nga 132 milionë në 130 milionë, duke reflektuar ndikimin e menjëhershëm të krizës së karburantit në industrinë ajrore.
Anulimet pritet të prekin veçanërisht udhëtarët në Mbretërinë e Bashkuar dhe në disa vende të Europës, në një periudhë kur kërkesa për udhëtime rritet ndjeshëm për shkak të pushimeve sezonale.
Ndër kompanitë europiane që kanë nisur anulimet përfshihen Turkish Airlines, Lufthansa, British Airways dhe KLM, të cilat po rishikojnë oraret dhe po reduktojnë fluturimet, sidomos në linjat më pak fitimprurëse.
Situata pritet të përkeqësohet gjatë verës, pasi mungesa e karburantit, e lidhur me konfliktin në Iran, vijon të ndikojë në furnizimin global. Që nga fillimi i konfliktit në muajin shkurt, çmimi i karburantit për avionë është më shumë se dyfishuar, ndërsa mbyllja e Ngushticës së Hormuzit ka ndërprerë një pjesë të konsiderueshme të furnizimit global me naftë.
Përballë kësaj situate, kompanitë ajrore po ndërmarrin masa për të kursyer karburant, duke përdorur avionë më të vegjël, duke rritur çmimet në linjat më të kërkuara dhe duke anuluar plotësisht disa destinacione.
Në Mbretërinë e Bashkuar, autoritetet kanë ndërhyrë për të lehtësuar presionin mbi operatorët. Ministrja e Transportit, Heidi Alexander, ka njoftuar pezullimin e përkohshëm të rregullit që detyron kompanitë të përdorin slotet e fluturimeve, duke u dhënë mundësi të reduktojnë oraret pa rrezikuar humbjen e tyre.
Për pasagjerët, kjo situatë përkthehet në rrezik real për planet e udhëtimit. Ata që nuk preken nga anulimet mund të përballen me riplanifikime të fluturimeve në data të tjera, çka mund të shkurtojë kohëzgjatjen e pushimeve të tyre.
Kriza e karburantit po shfaqet kështu si një faktor kyç që mund të ndikojë ndjeshëm sezonin turistik veror, duke krijuar pasiguri për udhëtarët dhe duke ushtruar presion të fortë mbi industrinë globale të aviacionit. /skyweb.al
