Pushimet e shkurtra, të shpërndara përgjatë vitit, mund të ndihmojnë në rikuperimin e vazhdueshëm nga stresi i punës dhe në ruajtjen e mirëqenies, sugjeron një studim i publikuar në revistën shkencore “Cureus”.
Studimi është realizuar nga studiues të Institucionit për Shëndetin dhe Kujdesin (NHS) në Britaninë e Madhe, në bashkëpunim me Spitalin Tawam në Al Ain të Emirateve të Bashkuara Arabe.
Në punimin me titull “Maksimizimi i rikuperimit: Epërsia e pushimeve të shpeshta për mirëqenien dhe performancën”, autorët Selvaraj Giridharan dhe Bhuvana Pandiyan argumentojnë se shpërndarja e ditëve të pushimit përgjatë vitit mund t’u japë punonjësve mundësi më të shpeshta për t’u çlodhur dhe për t’u rikuperuar nga ngarkesa e punës.
Sipas tyre, si pjesë e një strategjie për menaxhimin e stresit, punonjësit mund të planifikojnë pushime të shkurtra afërsisht çdo dy muaj. Po ashtu, autorët nënvizojnë rëndësinë e shkëputjes së plotë nga komunikimet, detyrat dhe përgjegjësitë e punës gjatë periudhës së pushimeve.
Një tjetër studim, i publikuar në “Journal of Happiness Studies”, ndoqi 54 punonjës gjatë pushimeve dhe në periudhën pas rikthimit në punë.
Pushimet zgjatën mesatarisht 23 ditë dhe pjesëmarrësit raportuan për gjendjen e tyre para pushimeve, disa herë gjatë tyre dhe në pesë momente të ndryshme pas rikthimit në punë.
Rezultatet treguan se mirëqenia dhe gjendja shëndetësore u përmirësuan shpejt gjatë pushimeve, duke arritur nivelin më të lartë rreth ditës së tetë.
Megjithatë, këto përmirësime nuk zgjatën gjatë pas rikthimit në punë. Brenda javës së parë, mirëqenia e pjesëmarrësve ishte kthyer në nivelet e regjistruara para pushimeve.
Studimi sugjeron se nuk është vetëm kohëzgjatja e pushimeve ajo që ndikon në mirëqenie, por edhe mënyra se si ato shfrytëzohen.
Relaksimi, kënaqësia nga aktivitetet, ndjenja e kontrollit mbi kohën, përfshirja në aktivitete dhe gjumi më i gjatë e më cilësor u shoqëruan me përmirësime më të mëdha në mirëqenie.
Duke u mbështetur në këto të dhëna, autorët argumentojnë se rikuperimi i rregullt mund të jetë më i dobishëm për mirëqenien sesa grumbullimi i ditëve të pushimit në një periudhë të vetme të vitit.
Për këtë arsye, ata propozojnë shpërndarjen e pushimeve në intervale më të shpeshta gjatë vitit, në mënyrë që rikuperimi nga stresi i punës të mos kufizohet vetëm në një periudhë të gjatë pushimesh.
