Bashkimi Europian ka nisur një hetim të gjerë ndaj chatbot-it Grok të Elon Musk në platformën X, pas reagimeve të forta globale, pasi u zbulua se ishte në gjendje të krijonte imazhe me përmbajtje seksuale, përfshirë edhe imazhe të fëmijëve.
Skandali shpërtheu në fund të vitit të kaluar, kur chatbot-i i inteligjencës artificiale prodhoi një numër të madh imazhesh ku gratë dhe fëmijët shfaqeshin të zhveshur në mënyrë digjitale, si përgjigje ndaj kërkesave të përdoruesve, raporton CNN.
Reagimi i fortë ndërkombëtar fillimisht u pasua nga një njoftim i X se përdorimi i këtij mjeti do të kufizohej vetëm për abonentët me pagesë, por kompania më pas vendosi të ndalojë plotësisht krijimin e imazheve të personave realë në veshje provokuese për të gjithë përdoruesit.
Komisioni Europian, deklaroi të hënën se hetimi do të shqyrtojë nëse X “i ka vlerësuar dhe zbutur siç duhet rreziqet që lidhen me vendosjen e funksionaliteteve të Grok në platformën X brenda BE-së”.
Henna Virkkunen, një zyrtare e lartë e Komisionit që mbulon teknologjinë, sigurinë dhe demokracinë, u shpreh se: “Deepfake-et seksuale të grave dhe fëmijëve janë një formë e dhunshme dhe e papranueshme poshtërimi. Me këtë hetim, do të përcaktojmë nëse X ka përmbushur detyrimet e tij ligjore apo nëse i ka trajtuar të drejtat e qytetarëve evropianë – përfshirë ato të grave dhe fëmijëve – si dëme anësore të shërbimit të tij.”
Në një konferencë për gazetarët, një tjetër zyrtar i Komisionit Europian pranoi se X ka ndërmarrë disa masa, por theksoi se kompania nuk i kishte vlerësuar siç duhet rreziqet përpara se të lançonte chatbot-in.
I pyetur për koment, X i referoi CNN-it një deklarate të publikuar më 14 janar në platformën e tij, ku thuhej ndër të tjera: “Ne veprojmë për të hequr përmbajtjen prioritare që shkel rregullat, përfshirë materialet e abuzimit seksual të fëmijëve dhe lakuriqësinë pa pëlqim, duke marrë masa të përshtatshme ndaj llogarive që shkelin rregullat e X. Gjithashtu, raportojmë tek autoritetet përkatëse rastet e kërkimit të materialeve të shfrytëzimit seksual të fëmijëve.”
Hetimi është hapur në bazë të Aktit të Shërbimeve Digjitale të BE-së, i cili u kërkon kompanive të mëdha teknologjike të marrin masa më të forta kundër përmbajtjeve të paligjshme dhe të dëmshme në internet.
Nuk ka ende një afat kohor për përfundimin e hetimit dhe as ndonjë tregues se çfarë masash mund të marrë Komisioni Evropian në bazë të gjetjeve. Megjithatë, një zyrtar, i cili kërkoi të mbetej anonim, u tha gazetarëve se institucioni ka “mjaft mjete në dispozicion” dhe se vendosja e një gjobe është e mundur. “Qëllimi ynë është të ndryshojmë sjelljen e platformës,” tha ai.
BE-ja e gjobiti platformën X me rreth 140 milionë dollarë në dhjetor, duke argumentuar se “dizajni mashtrues” i shenjës blu të verifikimit dhe funksione të tjera shkelin Aktin e Shërbimeve Digjitale. Në atë kohë, Musk e quajti gjobën “të çmendur”.
I pyetur nëse gjoba ishte paguar, zyrtari i BE-së tha se ende jo, por se kompania ka ende kohë për ta shlyer atë.
Në fillim të këtij muaji, Prokurori i Përgjithshëm i Kalifornisë, Rob Bonta, njoftoi gjithashtu nisjen e një hetimi për “përhapjen e materialeve seksualisht eksplicite pa pëlqim, të prodhuara përmes Grok”. Si pasojë e polemikave mbi gjenerimin e imazheve, Grok mbetet i ndaluar në Indonezi dhe Malajzi. Ndërkohë, edhe rregullatori britanik Ofcom ka nisur një hetim zyrtar ndaj X./skyweb.al
