Çmimet e naftës shënuan një rënie të lehtë të mërkurën, por mbetën mbi 100 dollarë për fuçi, ndërsa tregu vijon të përballet me pasiguri të mëdha për furnizimin nga Lindja e Mesme.
Sipas të dhënave të Reuters, nafta Brent zbriti me 0.67%, në 108.02 dollarë për fuçi, ndërsa nafta amerikane WTI ra me 1.04%, në 104.73 dollarë.
Tërheqja erdhi pas dy ditësh rritjeje, gjatë të cilave të dyja kontratat prekën nivelet më të larta që prej 19 majit.
Presioni mbi çmimet u shkaktua nga rritja e papritur e rezervave amerikane. Sipas Institutit Amerikan të Naftës, rezervat e naftës bruto u shtuan me 7.1 milionë fuçi gjatë javës së mbyllur më 11 shtator.
Analistët e anketuar nga Reuters prisnin, përkundrazi, një rënie me rreth 1.6 milionë fuçi. Rritje u regjistrua edhe në rezervat e benzinës dhe të produkteve të distiluara.
Megjithatë, shtimi i rezervave në SHBA nuk ka larguar shqetësimet për furnizimin global. Arabia Saudite ka pezulluar ngarkesat e naftës në portin Yanbu, pas sulmit ndaj tubacionit strategjik Lindje–Perëndim.
Tubacioni transporton rreth 4 milionë fuçi në ditë, afërsisht 4% të furnizimit botëror, dhe është veçanërisht i rëndësishëm për shmangien e Ngushticës së Hormuzit.
Sekretari amerikan i Energjisë ka deklaruar se furnizimi mund të rikthehet brenda disa ditësh, por burime të tjera vlerësojnë se riparimet mund të zgjasin deri në pesë ose gjashtë javë.
Pasiguritë janë shtuar edhe nga ndërprerja e aktivitetit në tri fusha nafte në Libi për shkak të protestave lokale, megjithëse prodhimi i përgjithshëm i vendit mbetet rreth 1.4 milionë fuçi në ditë.
Pavarësisht rënies së lehtë gjatë mëngjesit, tregu global mbetet i tensionuar dhe çdo zgjatje e problemeve në Arabinë Saudite ose përshkallëzim i konfliktit në Lindjen e Mesme mund t’i shtyjë sërish çmimet drejt niveleve më të larta. /skyweb.al
