Kamionët dhe betonieret e tonazhit të rëndë vijojnë të qarkullojnë gjatë ditës në zonat më të ngarkuara të Tiranës, edhe pse lëvizja e tyre është e kufizuar. Rasti më i fundit është raportuar pasditen e 15 shtatorit, në zonën e Unazës së Vogël.
Një kamion Mercedes i kompanisë “ALESIO-2014” është fotografuar duke qarkulluar rreth orës 18:00, ndërsa pranë tij ndodhej edhe një automjet i Policisë Rrugore, raporton bolndws.al.
Sipas rregullave të Bashkisë së Tiranës, qarkullimi i mjeteve të rënda brenda Unazës së Vogël ndalohet nga ora 07:00 deri në 20:00, ndërsa furnizimi lejohet gjatë natës.
Rasti i fundit nuk është i izoluar. Në korrik, Skyweb.al publikoi pamje të dy betoniereve që lëviznin në mesditë pranë Bashkisë së Tiranës, sërish me një automjet policie në afërsi dhe pa ndërhyrje të dukshme.
View this post on Instagram
Raportimi erdhi pas aksidentit tragjik të 22 korrikut pranë rrethrrotullimit të TEG-ut, ku një kamion-pompë betoni i kompanisë “Alba Beton” u përplas me një automjet, duke shkaktuar dy viktima dhe një të plagosur.
DPSHTRR deklaroi atëherë se drejtuesi dhe manovratori i mjetit të rëndë nuk rezultonin të pajisur prej saj me dokumentacion shqiptar që certifikonte aftësimin e tyre.
Pas një aksidenti me dy viktima dhe rasteve të përsëritura të dokumentuara në terren, qarkullimi i mjeteve të rënda në oraret e ndaluara nuk mund të trajtohet më vetëm si shkelje trafiku.
Policia Rrugore dhe Bashkia e Tiranës duhet të sqarojnë se përse vijon lejimi i qarkullimit të kamionëve të rëndë në mes të kryeqytetit në orare të ndaluara. /skyweb.al
