Ministri për Pushtetin Vendor, Ervin Demo prezantoi pas mbledhjes së Këshillit të Ministrave programin e ri kombëtar “Rilindja 2.0”, një iniciativë e integruar për zhvillimin territorial dhe rajonal të qëndrueshëm, e cila synon krijimin e një modeli të ri zhvillimi për bashkitë në Shqipëri.
Programi bazohet në 11 shtylla kryesore, të cilat përfshijnë: forcimin e identitetit lokal përmes muzeve dhe trashëgimisë kulturore, modernizimin e sistemeve të parkimit, transformimin e ish-zonave industriale, përmirësimin e arkitekturës së infrastrukturës publike, mbështetjen e startup-eve dhe inovacionit lokal, zgjerimin e shërbimeve mjedisore, zhvillimin e transportit publik me autobusë elektrikë, krijimin e hapësirave sportive dhe rekreative, investimet në ujësjellës dhe kanalizime, rritjen e kapaciteteve logjistike të bashkive, si dhe ndërtimin e qyteteve inteligjente.
Në thelb, “Rilindja 2.0” synon të transformojë bashkitë shqiptare në komunitete më funksionale, të pastra, të aksesueshme dhe më të përafruara me standardet europiane, duke lidhur investimet publike me zhvillimin ekonomik, turizmin, shërbimet dhe përmirësimin e cilësisë së jetës për qytetarët.
