Instituti i Sigurimeve Shoqërore u ka bërë thirrje të gjithë fermerëve dhe të vetëpunësuarve në bujqësi të paraqiten pranë zyrave të sigurimeve në zonën ku banojnë për t’u informuar mbi detyrimet dhe procedurat e pagesës së kontributeve, në kuadër të zbatimit të ligjit të ri për shlyerjen e detyrimeve tatimore.
Thirrja vjen pas miratimit nga Parlamenti i Shqipërisë të ligjit nr. 86/2025, i cili parashikon fshirjen e gjobave dhe kamatëvonesave për sigurimet shoqërore dhe shëndetësore për këtë kategori, për periudhat e kaluara, sipas kushteve të përcaktuara në nenet 5 dhe 6 të tij.
Sipas dispozitave të ligjit, për periudhat tatimore deri më 31 dhjetor 2014 shuhen plotësisht gjobat dhe kamatëvonesat, ndërsa për periudhën nga 1 janari 2015 deri më 31 dhjetor 2024, ato shuhen me kusht që të paguhet i plotë kontributi brenda datës 31 dhjetor 2026.
Institucioni sqaron se kontributet e sigurimeve për të vetëpunësuarit në bujqësi, që nga hyrja në fuqi e ligjit bazë të sigurimeve shoqërore në vitin 1993 deri në fund të vitit 2024, mund të paguhen pa penalitete, sipas niveleve të përcaktuara me vendim të Këshillit të Ministrave.
Kontributi vjetor për zonat fushore është 38 400 lekë, ndërsa për zonat malore 29 400 lekë.
Sipas ISSH-së, pagesa e detyrimeve pa kamatëvonesa u mundëson fermerëve të mbulojnë periudhat e kaluara me kontribute, duke rritur mundësinë për përfitime më të mira nga skema e sigurimeve në të ardhmen.
Institucioni u bën thirrje fermerëve të përfitojnë nga kjo mundësi brenda afateve ligjore dhe të verifikojnë situatën e tyre pranë strukturave përkatëse. /skyweb.al
