Maqedonia e Veriut dhe Shqipëria po planifikojnë ndërtimin e një gazsjellësi të ri, që do të lidhë qytetin e Manastirit me kufirin shqiptar dhe më pas do të vijojë drejt Elbasanit.
Lajmi është bërë i ditur nga ministrja e Energjisë e Maqedonisë së Veriut, Sanja Bozhinovska, e cila përmes rrjeteve sociale njoftoi se projekti është në fazë planifikimi.
Sipas saj, gazsjellësi do të nisë nga qyteti jugor i Manastirit, do të shkojë drejt kufirit me Shqipërinë në pjesën perëndimore të Maqedonisë së Veriut dhe më pas do të vazhdojë deri në Elbasan.
Bozhinovska bëri të ditur gjithashtu se projekti është diskutuar javën e kaluar me kompanitë vendase të energjisë.
Nëse realizohet, ky gazsjellës pritet të forcojë lidhjet energjetike mes dy vendeve dhe të krijojë një korridor të ri për furnizimin me gaz në rajon.
Projekti vjen në një kohë kur vendet e Ballkanit po kërkojnë të rrisin sigurinë energjetike dhe të zgjerojnë rrjetet e furnizimit me gaz. /skyweb.al
