Salmonela vijon të përbëjë një shqetësim për shëndetin publik në Evropë, ndërsa autoritetet shëndetësore kanë raportuar një numër të konsiderueshëm rastesh dhe shpërthimesh të lidhura me ushqimet.
Të dhënat e publikuara nga Qendra Evropiane për Parandalimin dhe Kontrollin e Sëmundjeve (ECDC) tregojnë se rastet e salmonelozës kanë ardhur në rritje që prej vitit 2020. Në fokus të veçantë janë fëmijët e vegjël, veçanërisht ata nën moshën katër vjeç.
Gjatë periudhës maj 2025–gusht 2026, në kuadër të shpërthimeve të hetuara në Evropë u konfirmuan 341 raste. Mbretëria e Bashkuar kryesonte me 207 raste, e ndjekur nga Holanda me 106. Belgjika raportoi 15 raste, ndërsa në Gjermani u regjistruan 6, në Francë 4, në Austri 2 dhe në Danimarkë 1.
Shifrat për Mbretërinë e Bashkuar u rishikuan më pas, duke e çuar në 474 numrin e rasteve të lidhura me shpërthimin. Hetimet vijojnë, ndërsa dyshimet janë përqendruar edhe te konsumimi i ushqimeve jashtë shtëpisë.
Gjermania, Franca dhe Spanja me numrin më të lartë të rasteve
Në të dhënat e përgjithshme për Bashkimin Evropian gjatë vitit 2024, Gjermania rezulton me numrin më të madh të rasteve të raportuara, me 12,316 raste. Pas saj renditet Franca me 12,308 raste, ndërsa Spanja raportoi 11,248 raste.
Në anën tjetër, numri më i ulët i rasteve u raportua në Qipro, me 80 raste, Estoni me 103 dhe Maltë me 164.
Ekspertët theksojnë se diferencat mes vendeve nuk lidhen domosdoshmërisht vetëm me përhapjen e bakterit. Ato mund të ndikohen edhe nga mënyra se si kryhen testimet, raportimi i rasteve dhe hetimet epidemiologjike në secilin shtet.
Vezët dhe ushqimet e tjera në qendër të hetimeve
Një nga shpërthimet më të rëndësishme të raportuara së fundmi ka ndodhur në Belgjikë, ku më shumë se 300 persona u sëmurën pas konsumimit të vezëve.
Por vezët nuk janë i vetmi ushqim i lidhur me rastet e salmonelës. Në hetime janë përfshirë edhe makarona, fara kungulli, produkte të qumështit dhe ushqime me bazë shpendësh.
Salmonela transmetohet kryesisht përmes ushqimit të kontaminuar. Rreziku rritet veçanërisht nga konsumimi i mishit, shpendëve dhe vezëve të pagatuara mirë, si dhe nga produktet e qumështit të papasterizuara.
Simptomat dhe grupet më të rrezikuara
Infeksioni zakonisht shkakton diarre, temperaturë, dhimbje barku dhe të përziera. Në shumicën e rasteve, simptomat largohen brenda rreth një jave.
Megjithatë, salmoneloza mund të jetë më e rrezikshme për fëmijët e vegjël, të moshuarit dhe personat me sistem imunitar të dobësuar.
Në Bashkimin Evropian raportohen çdo vit më shumë se 91 mijë raste të salmonelozës, ndërsa ndikimi ekonomik i infeksioneve vlerësohet deri në 3 miliardë euro në vit, duke përfshirë kostot mjekësore, hospitalizimet dhe humbjet e produktivitetit.
Autoritetet shëndetësore vijojnë të rekomandojnë respektimin e rregullave të higjienës, ruajtjen e ushqimeve në temperaturat e duhura dhe gatimin e plotë të produkteve ushqimore si masa kryesore për uljen e rrezikut të infektimit.
