Mbi 6,600 fermerë pritet të marrin së shpejti pagesat nga Skema Kombëtare e Mbështetjes në Bujqësi për vitin 2026.
Agjencia për Zhvillimin Bujqësor dhe Rural njoftoi se deri tani janë autorizuar 6,609 pagesa dhe fondet janë kaluar në Thesarin e Shtetit. Shumat pritet të depozitohen në llogaritë bankare të përfituesve, ndërsa procesi vazhdon për fermerët e tjerë.
Interesi për subvencionet ka qenë ndjeshëm më i lartë se mundësitë financiare të skemës. Në total janë paraqitur 42,728 aplikime, me një vlerë të kërkuar prej 7.2 miliardë lekësh, ndërsa fondi në dispozicion është 5.2 miliardë lekë.
Kjo do të thotë se kërkesat e fermerëve e tejkalojnë buxhetin e skemës me rreth 2 miliardë lekë.
Fieri kryeson për numrin e aplikimeve, i ndjekur nga Korça, Elbasani dhe Vlora, qarqe që mbajnë një pjesë të rëndësishme të prodhimit bujqësor dhe blegtoral në vend.
Në fazën e parë u kualifikuan rreth 21 mijë blegtorë dhe bletarë, ndërsa aplikantëve iu dha kohë për plotësimin e dokumentacionit shtesë.
Numri më i madh i aplikimeve të kualifikuara i përket mbështetjes për tufat e bagëtive të imta, me 7,234 raste. Pas tyre renditen bletarët me rreth 7 mijë përfitues të kualifikuar.
Për tufat e lopëve janë kualifikuar 6,661 aplikime, ndërsa për mbarështimin e dosave dhe paradosave janë miratuar 269 aplikime.
Skema Kombëtare e vitit 2026 përmban 12 masa mbështetëse, nga të cilat nëntë janë pagesa direkte dhe tri financojnë investime.
Mbështetja direkte përfshin tufat bazë të gjedhit dhe të bagëtive të imta, bletarinë, dosat dhe paradosat, kontrollin biologjik, fermat organike, certifikimin Global G.A.P., sipërfaqet e mbjella dhe ripopullimin e ujërave të brendshme.
Tri masat e investimeve financojnë fermerët deri në moshën 40 vjeç, ndërtimin ose rikonstruksionin e staneve dhe mekanizimin e bujqësisë.
Sipas AZHBR-së, mbështetja synon uljen e kostove, rritjen e cilësisë së produkteve, përmirësimin e standardeve dhe nxitjen e praktikave të qëndrueshme në bujqësi.
