Zënia e hapësirave publike, rrugëve, shesheve dhe çdo hapësire tjetër që ndihmon sado pak lehtësimin e jetesës së qytetarëve është kthyer në një sport kombëtar në këtë vend.
Sheshet zihen me ndërtime, parkimet me bidonë, shishe, kuti dhe lloj lloj rraqesh që sjellin “banditët” e rinj të qytetit si Tirana, ndërkohë që më skandalozja është kur rrugët zihen nga kompani që janë duke ndërtuar kulla dhe pallate.
Por ky nuk është problemi më i madh, kur mendohet standardi që ka Shqipëria. Problemi nis kur qytetarëve u duhet të rrihen me njëri-tjetrin se kush do të kalojë i pari në këto rrugë të ngushta, që zihen dita-ditës nga ndërtues të ndryshëm.
Redaksia e Skyweb.al ka marrë një mori denoncimesh gjatë ditëve të fundit nga banorë të kompleksit “Turdiu”, në zonën e ish-Fushës së Aviacionit, i cili po ndërtohet nga kompania “Alesio 2014”.
Banorët shprehen se kompania ka zënë gjysmën e rrugës, duke e kthyer rrugën mes godinave në njëkalimshe. Bëhet fjalë për rrugën që pret në formë T-je rrugët “Ana Komnena” dhe “Abedin Rexha”, pas shkollës 9-vjeçare “Dhora Leka”.
Sipas banorëve, ky problem vijon prej disa muajsh dhe thuajse çdo javë aty ka sherre mes përdoruesve të rrugës se cili ka përparësinë e kalimit.
Ngjarja më e fundit ndodhi javën e kaluar, kur një shofer u godit në mënyrë barbare nga një i “fortë”. Materialet video të rrahjes i janë dërguar policisë.
Në këtë vend, ku bashkia njofton se do të prishë rrugën e shtruar nga banorët, nuk bëjnë çudi gjëra të tilla si zënia e rrugës nga kompani ndërtimi në shërbim të pasurimit të tyre.
Por do të ishte e udhës që fillimisht rruspat që Anuela Ristani ka nisur për prishjen e asfaltit të ndërtuar nga banorët në një rrugë pak më tutje, t’i çojë për lirimin e rrugës tjetër, që të mos ketë më sherre mes banorëve. /skyweb.al
