Qeveria e Maqedonisë së Veriut ka ndërmarrë një tjetër ndërhyrje në tregun e karburanteve, duke ulur më tej akcizën dhe duke zgjatur masat fiskale për të frenuar rritjen e çmimeve.
Vendimi i fundit parashikon një ulje shtesë të akcizës me 4 denarë për litër për naftën dhe 2 denarë për litër për benzinat 95 dhe 98 oktan. Paralelisht, është shtyrë deri më 20 prill edhe masa për uljen e TVSH-së nga 18% në 10%, e cila ishte vendosur fillimisht në muajin mars.
Efekti në treg ka qenë i menjëhershëm. Konsumi i karburanteve ka arritur në rreth 2 milionë litra në ditë gjatë javës së fundit, nga afërsisht 1.5 milionë litra që ishte më parë. Rritja lidhet kryesisht me kërkesën në rritje nga drejtues mjetesh që vijnë nga vendet fqinje, të tërhequr nga çmimet më të ulëta.
Autoritetet kanë sqaruar se nuk pritet asnjë kufizim në furnizim. Sipas tyre, pas konsultimeve me operatorët dhe furnizuesit, tregu ka kapacitet të përballojë kërkesën pa krijuar mungesa për konsumatorët vendas.
Në këtë skemë, rolin kryesor e ka Komisioni Rregullator i Energjisë, i cili përcakton çmimet maksimale me pakicë për karburantet, duke u bazuar në tregjet ndërkombëtare dhe kuadrin ligjor në fuqi.
Aktualisht, çmimet e karburanteve në Maqedoninë e Veriut janë në rritje krahasuar me periudhën para krizës në Lindjen e Mesme. Benzina Eurosuper 95 tregtohet me 84 denarë për litër, Eurosuper 98 me 85.5 denarë dhe Eurodiesel me 95.5 denarë. Krahasuar me më parë, rritja arrin rreth 10 denarë për litër për benzinën dhe deri në 26.5 denarë për naftën.
