Jo vetëm “Diella”, por edhe një personazh i ri i krijuar me Inteligjencë Artificiale do të bëhet pjesë e shërbimeve digjitale të qeverisë.
Bëhet fjalë për “Yllin”, asistentin e parë virtual të fermerit shqiptar, i prezantuar këtë të hënë, më 1 qershor, nga ministri i Bujqësisë dhe Zhvillimit Rural, Andis Salla. Platforma synon të ofrojë informacion, orientim dhe asistencë në kohë reale për fermerët, duke lehtësuar aksesin në shërbime dhe duke afruar sektorin e bujqësisë me standardet europiane.
Gjatë prezantimit, ministri Salla theksoi se “Ylli” do të jetë i integruar në Portalin e Fermerit, përmes të cilit përdoruesit mund të aplikojnë online për skemat kombëtare të mbështetjes dhe të marrin informacion të specializuar agronomik.
“Sot ne po lançojmë një nga platformat tona, siç është portali i fermerit, ndaj përmes këtij portali të gjithë do të kenë mundësi të aplikojnë online për skemat tona kombëtare, të aksesojnë informacion agronomik lidhur me pesticidet, përdorimin e tyre, të plehrave kimike, ujitje, e të tjera.
Sot jemi duke prezantuar një tjetër, i cili do të jetë asistenti i çdo fermeri, në çdo telefon, ku një element i rëndësishëm i këtij portali, që ne i kemi vendosur edhe emrin Ylli, është asistenti i parë digjital i fermerit shqiptar, i bazuar në inteligjencën artificiale. Ylli është gjithkund gati, është aty për të ofruar asistencë të menjëhershme dhe praktike për fermerët, ku në kohë reale është gati për të shënuar, dëgjuar, shkruar, bashkëbiseduar për problemet që kanë fermerët dhe duke kthyer përgjigje në kohë reale, në gjuhën shqipe”, tha ai.
