Vizitorët që kërkojnë të udhëtojnë drejt Shteteve të Bashkuara të Amerikës do të përballen me një tarifë të re më të lartë për vizat jo-imigruese. Administrata amerikane ka miratuar një dispozitë të re që rrit ndjeshëm koston e vizës për turistët, studentët dhe udhëtarët e biznesit, duke e çuar atë nga 170 në të paktën 250 dollarë. Rritja e tarifës është pjesë e të ashtuquajturit “Visa Integrity Fee”, një nismë e përfshirë në paketën ligjore “One Big Beautiful Bill”, e miratuar kohët e fundit gjatë administratës Trump.
Sipas dispozitës, tarifa do të aplikohet për të gjithë ata që kanë nevojë për viza jo-imigruese për të hyrë në SHBA, ndërsa shtetasit e vendeve të përfshira në Programin e Heqjes së Vizave (si Australia, Japonia dhe shumica e vendeve të BE-së) nuk preken nga kjo rritje.
Tarifa do të paguhet në momentin e lëshimit të vizës dhe nuk do të aplikohet për ata që marrin refuzim. Në parim, mbajtësit e vizave që respektojnë të gjitha kushtet, përfshirë mosqëndrimin më gjatë se pesë ditë pas skadencës dhe mospunësimin ilegal, do të kenë të drejtë rimbursimi.
Megjithatë, mekanizmi për kthimin e shumës mbetet ende i paqartë dhe autoritetet pranojnë se shumë pak udhëtarë do ta kërkojnë atë.
Shoqata Amerikane e Udhëtimeve ka ngritur shqetësime për mungesë transparence dhe paqartësi në mënyrën e zbatimit të tarifës.
Ndërkohë, Departamenti i Sigurisë Kombëtare e ka cilësuar si një masë për të “rivendosur integritetin e sistemit të imigracionit”.
Ndryshe nga pretendimi për shkelje të rregullave, të dhënat zyrtare tregojnë se mbi 98% e mbajtësve të vizave nuk kanë thyer kushtet e tyre gjatë periudhës 2016–2022. Megjithatë, rreth 42% e emigrantëve të paautorizuar në SHBA thuhet se kanë hyrë ligjërisht dhe më pas kanë qëndruar përtej afatit të lejuar. /skyweb.al
