Anila, një grua sipërmarrëse realizoi ëndrrën e saj duke hapur pastiçerinë “Ëmbëlsira by Anila”. Pak ditë pas inaugurimit, një zjarr aksidental shkatërroi gjithçka. E tronditur dhe pa ditur nga t’ia niste, Anila iu drejtua sigurimit të saj: rrjetës së saj të sigurisë financiare. “Kam një police sigurimi të biznesit, dua ndihmën tuaj”
Festimi e siguron jetesën si drejtues automjeti në shërbimin taksi. Një ditë, ndërsa po udhëtonte në një rrugë të mbuluar nga akulli, ai pësoi një aksident të rëndë. Kostot e riparimit ishin të larta. Vetëpunësimi i tij si taksist ishte në rrezik. Festimi kujtoi rrjetën e tij të sigurisë: sigurimin KASKO të automjetit.
Nuk është cliché, sigurimi luan rol thelbësor në jetët tona. Ai na mbështet të përballemi me ngjarje të papritura dhe vështirësi. Sigurimi lidhet me menaxhimin e rrezikut: mundësinë që të pësojmë një humbje financiare.
Për ëmbëltoren e Anilës rreziku ishte zjarri; për taksine e Festimit rreziku ishte aksidenti automobilistik.
Në përgjithësi, rreziku mund të menaxhohet në katër mënyra kryesore.
1. Ta shmangësh rrezikun. Kjo nënkupton të shmangësh sipërmarrjen e situatave që paraqesin rrezik. Në të njëjtën kohë mund të nënkuptojë edhe heqjen dorë nga ëndrrat dhe mundësitë tona. Nëse do të kishte zgjedhur këtë rrugë Anila nuk do ta kishte pastiçerinë, ndërsa Festimi nuk do të kishte një automjet të tijin taksi.
2. Reduktimi i rrezikut, si mënyrë nënkupton marrjen e masave parandaluese. Anila, në pastiçerinë e saj mund të instalojë sisteme alarmi kundër zjarrit, ndërsa Festimi mund të shmangë rrugët me trafik të dendur ose drejtimin e mjetit në kushte të rrezikshme. Këto masa e ulin rrezikun, por megjithatë nuk e eliminojnë plotësisht atë.
3. Pranimi i rrezikut, rrugë e cila nënkupton vendimin për ta përballuar vetë një rrezik të mundshëm. Anila do ta riparojë pa kokëçarje dëmin nga zjarri në pastiçeri. Festimi do ta ribëjë nga e para vetë taksinë e tij të shtypur si mos më keq nga përplasja.
4. Së fundi, kemi transferimin e rrezikut. Kjo mënyrë përbën një nga parimet themelore të sigurimit. Në këtë rast, të siguruarit, si Anila dhe Festimi, paguajnë një primi sigurimi të rregullt te një kompani sigurimi, duke transferuar te kjo kompani një pjesë të rrezikut financiar. Kur Anila pëson një zjarr ose Festimi përfshihet në një aksident automobilistik, kompania e sigurimit përdor fondin e krijuar nga primet e paguara nga të siguruarit për të mbuluar, sipas kushteve të policës, humbjet.
Sigurimi nuk mbron vetëm individët, por kontribuon edhe në funksionimin dhe zhvillimin e ekonomisë.
Si duhet kuptuar kjo?
Duke ditur se sigurimi do t’i mbulonte sipas kontratës kostot e një zjarri të mundshëm, Anila nuk e mendoi gjatë për të hapur biznesin e saj dhe për të punësuar staf.
Po kështu, duke pasur mbulimin e sigurimit KASKO për kostot e një aksidenti në rrugë në mjetin e tij, Festimi i lejoi vetes një taksi vërtetë komode të një vitprodhimi të ri, me të cilën klientët ndihen vërtetë rehat.
Edhe vetë sektori i sigurimeve krijon vende të shumta pune, nga agjentët dhe brokerat, te vlerësuesit e rrezikut dhe specialistët e trajtimit të dëmeve, etj.
Kompanitë e sigurimit gjithashtu investojnë një pjesë të primeve që mbledhin nga të siguruarit, si Anila dhe Festimi, në sektorë të ndryshëm të ekonomisë, duke kontribuar më tej në aktivitetin ekonomik.
Sigurimi ofron siguri financiare që mbështet inovacionin, sipërmarrjen dhe rritjen ekonomike.
Ai ndihmon në mbajtjen e ekonomisë qarkulluese, duke u krijuar individëve dhe bizneseve mundësinë të ndjekin objektivat e tyre dhe të përballojnë rreziqe të caktuara, duke ditur se kanë një rrjet sigurie financiare në rast se gjërat shkojnë keq.
Pa një sigurim je akrobati që ecën mbi litarin që lëkundet. Befas akrobati kujton se… nuk është akrobat. /Sigurime.Online
