TikTok nuk është më nën pronësinë kineze, por tashmë kalon nën kontroll amerikan, me një pjesëmarrje të kufizuar nga Emiratet e Bashkuara. Donald Trump nënshkroi gjatë natës urdhrin ekzekutiv që formalizon transferimin e operacioneve të platformës së videove të shkurtra në SHBA, duke hapur rrugën për një marrëveshje që ndryshon ndjeshëm balancat e pronësisë.
Aksionerët e rinj përfshijnë gjigantin e cloud Oracle, i drejtuar nga Larry Ellison – një nga njerëzit më të pasur në botë dhe i afërt me Trump – si dhe fondin e investimeve Silver Lake. Në këtë skemë është përfshirë edhe MGX, kompania shtetërore e Emirateve që merret me zhvillimin e inteligjencës artificiale dhe teknologjive të avancuara.
Të tre së bashku pritet të zotërojnë rreth 45% të TikTok-ut, me një vlerë të vlerësuar prej 14 miliardë eurosh. Themeluesit kinezë të ByteDance do të mbeten me më pak se 20%, ndërsa 35% e aksioneve të tjera do të ndahen mes investitorëve të hershëm dhe aksionarëve të rinj, përfshirë Michael Dell dhe Rupert Murdoch.
Urdhri ekzekutiv i ish-presidentit përcakton se marrëveshja është në përputhje me ligjin e miratuar në vitin 2023 nga Kongresi amerikan, i cili e konsideronte pronësinë kineze të TikTok një kërcënim për sigurinë kombëtare. Ligji detyronte që dega amerikane të hiqej nga investimet kineze ose të mbyllej. Pas rikthimit në Shtëpinë e Bardhë, Trump shtyu disa herë ultimatumin, derisa arriti një marrëveshje me Pekinin.
Çështja kryesore mbetet fati i algoritmit të TikTok, zemra e teknologjisë që i garantoi suksesin global. Sipas raportimeve, marrëveshja parashikon që ByteDance t’ia japë me licencë algoritmin kompanisë së re amerikane, e cila do të ketë të drejtën ta “ritrajnojë” sipas nevojës.
TikTok USA do të drejtohet nga një bord me shumicë amerikane, ku kinezët do të kenë vetëm një përfaqësues. Oracle, që tashmë ruan të dhënat e përdoruesve amerikanë në serverat e saj, do të mbikëqyrë sigurinë e tyre.
Pas telefonatës së fundit mes Trump dhe Xi Jinping, presidenti kinez pranoi marrëveshjen, duke e quajtur një “business-to-business deal”, për të shmangur përplasjen e drejtpërdrejtë dhe për të ruajtur imazhin e Kinës. Ende nuk është e qartë nëse dhe çfarë lëshimesh të tjera ka përfituar Pekini në këmbim të këtij kompromisi. /skyweb.al
