Gati tre miliardë njerëz në mbarë botën nuk kanë mundësi të përballojnë një dietë të shëndetshme, pasi kostoja e ushqyerjes së shëndetshme është rritur ndjeshëm gjatë viteve të fundit.
Kostoja globale e një diete të shëndetshme është rritur me 25% gjatë pesë viteve të fundit, duke tejkaluar kufirin e varfërisë ekstreme, të jetosh me më pak se 3 dollarë (2,62 euro) në ditë, paralajmëroi Organizata e Kombeve të Bashkuara (OKB).
“Si rezultat, 2,69 miliardë njerëz, pothuajse një në çdo tre persona në botë, ende nuk mund të përballojnë një dietë të shëndetshme,” tha Máximo Torero Cullen, kryeekonomist i Organizatës së Ushqimit dhe Bujqësisë (FAO) pranë OKB-së, gjatë një deklarate për gazetarët përpara publikimit të raportit “Gjendja e Sigurisë Ushqimore dhe Ushqyerjes në Botë”, i cili do të publikohet më 21 korrik.
Ai shtoi se kostoja aktuale e një diete të shëndetshme, një dietë që plotëson të gjitha nevojat ushqyese është 4,28 dollarë për person në ditë, e përshtatur sipas ndryshimeve në koston e jetesës midis vendeve. Kjo shumë është më e lartë se kufiri ndërkombëtar i varfërisë ekstreme, i cili është vendosur në 3 dollarë (2,62 euro) për person në ditë.
Pjesa më e madhe e shpenzimeve nuk lidhet me sigurimin e kalorive të mjaftueshme, por me konsumimin e ushqimeve të pasura me lëndë ushqyese.
“Kaloritë janë relativisht të lira, por ushqimi me vlera ushqyese nuk është,” tha Torero.
Ushqimet bazë, të cilat konsumohen çdo ditë, si drithërat dhe perimet rrënjore, përbëjnë pjesën më të madhe të kalorive ditore të një personi, por përfaqësojnë vetëm 13% të kostos së një diete të shëndetshme.
“Në të kundërt, frutat dhe perimet sigurojnë vetëm 5% të kalorive, por përbëjnë 16% të kostos, duke qenë dukshëm më të shtrenjta se drithërat. Ndërsa ushqimet me origjinë shtazore përbëjnë pothuajse 30% të kostos së një diete të shëndetshme,” theksoi Torero.
Prandaj, sfida nuk është të prodhohen mjaftueshëm kalori, por të bëhen më të përballueshme ushqimet e pasura me lëndë ushqyese, tha ai.
Sipas Organizatës Botërore të Shëndetësisë (OBSH), një dietë e pashëndetshme është një nga faktorët kryesorë të rrezikut për barrën globale të sëmundjeve, veçanërisht për sëmundjet jo të transmetueshme si sëmundjet kardiovaskulare, diabeti dhe kanceri. /skyweb.al
