Kryeministri Edi Rama ka rikthyer në vëmendje problematikën e ndërtimeve pa leje, duke vënë në kontrast rastet e qytetarëve të zakonshëm që ndëshkohen për ndërhyrje të vogla, me objektet shumëkatëshe në qendër të Tiranës që kanë arritur të ngrihen pa pengesa.
Në një deklaratë publike, Rama solli shembullin e një 90-vjeçari në zonën e Dajtit, i cili përfundoi në prokurori dhe gjykatë pasi kishte kryer një riparim pa leje. “Sikur të mblidheshin gjithë fshatarët që policia u ka vënë gjoba për një avlli, do të bëhej mitingu më i madh pas atij të Zhou Enlait,” tha ai me ironi.
Nga ana tjetër, kryeministri përmendi godinën e njohur si “Syri i Tiranës”, ku sipas tij janë ndërtuar kat pas kati në shkelje të ligjit, pa u ndaluar nga inspektorët ndër vite. “Në mes të Tiranës, Syri i Tiranës ka 4-5 kate pa leje. Mesazhi është i qartë: sado të madh ta kesh emrin në ndërtim, shteti është më i madh se ti dhe nuk e gëzon dot ndërtimin pa leje,” theksoi Rama.
Ai paralajmëroi se praktikat e deritanishme do të marrin fund dhe se çdo ndërtim jashtë ligjit do të konfiskohet nga shteti, pavarësisht kush është përfituesi. /skyweb.al
