Senati amerikan ka miratuar me mbështetje dypartiake një projektligj që synon të modernizojë rregullat për shëndetin mendor të pilotëve dhe kontrollorëve të trafikut ajror, me qëllim nxitjen e raportimit të hershëm të problemeve dhe marrjen e trajtimit.
Pilotët e linjave ajrore komerciale shpesh i fshehin problemet e shëndetit mendor nga frika se deklarimi i marrjes së terapisë apo medikamenteve, apo edhe thjesht kërkimi i ndihmës, mund t’u kushtojë licencën e fluturimit. Kjo situatë mund të rrezikojë si vetë pilotët, ashtu edhe pasagjerët.
Çështja mori vëmendje të re pas një incidenti në fund të vitit 2023, kur një pilot i “Alaska Airlines”, i cili nuk ishte në detyrë, u akuzua se ishte përpjekur të çaktivizonte motorët e një avioni gjatë fluturimit. Pas incidentit, ai i tha policisë se po përjetonte një krizë nervore.
Projektligji, i sponsorizuar nga senatorët John Hoeven dhe Tammy Duckworth, u miratua njëzëri të enjten në mbrëmje. Ai synon të inkurajojë pilotët dhe kontrollorët e trafikut ajror që të kërkojnë ndihmë për shëndetin mendor kur është e nevojshme, duke ulur njëkohësisht stigmën që lidhet me trajtimin psikologjik.
Një projektligj i veçantë, i miratuar gjithashtu nga Senati, kërkon që Administrata Federale e Aviacionit (FAA) të publikojë udhëzime të qarta dhe lehtësisht të kuptueshme për medikamentet e lejuara.
Qëllimi është që pilotët dhe kontrollorët e trafikut ajror të mos marrin pa e ditur medikamente që mund të ndikojnë në aftësinë e tyre për të ushtruar profesionin ose të rrezikojnë licencën e tyre.
