Linjat ajrore europiane po përballen me krizën më të rëndë që nga pandemia COVID-19, ndërsa lufta në Iran ka rritur ndjeshëm çmimet e karburantit të aviacionit dhe ka tronditur trafikun ajror në Lindjen e Mesme, në prag të sezonit veror.
Sipas zhvillimeve të fundit, çmimi i karburantit për avionë është rritur me rreth 84% që nga fillimi i konfliktit më 28 shkurt, duke shtuar ndjeshëm kostot për kompanitë ajrore. Deri tani, operatorët kanë arritur ta përballojnë situatën falë kontratave të sigurimit të çmimeve, por këto mbrojtje financiare po shterojnë, duke rritur pasiguritë për muajt në vijim.
Drejtues të industrisë paralajmërojnë se ekziston rreziku i kufizimeve në furnizimin me karburant, veçanërisht në Evropë dhe Azi, nëse konflikti vijon. Megjithatë, aktualisht furnizimi konsiderohet ende i qëndrueshëm.
Ndryshe nga pandemia, kur kërkesa për udhëtime u rrëzua dhe industria humbi qindra miliarda euro, kjo krizë ka një natyrë tjetër. Sipas ekspertëve, problemi kryesor sot është rritja e kostove, ndërsa kërkesa për fluturime mbetet e fortë.
Megjithatë, pasiguria po reflektohet në sjelljen e konsumatorëve. Disa kompani raportojnë rënie të prenotimeve për sezonin veror, ndërsa udhëtarët po shtyjnë planet ose po zgjedhin destinacione më të afërta për të shmangur çmimet e larta dhe rreziqet e ndërprerjeve.
Linjat ajrore kanë nisur të reagojnë duke rritur çmimet e biletave dhe duke reduktuar kapacitetet e fluturimeve. Në të njëjtën kohë, performanca financiare e sektorit pritet të reflektojë këto zhvillime, me publikimin e rezultateve të tremujorit të parë nga kompanitë kryesore europiane.
Ndikimi i krizës është veçanërisht i fortë për linjat ajrore të Lindjes së Mesme, ku fluturimet kanë rënë me rreth 50% krahasuar me një vit më parë, ndërsa rezervimet për muajt e ardhshëm janë në rënie të ndjeshme.
Megjithatë, në nivel global, kapaciteti i transportit ajror vijon të jetë në rritje të lehtë, duke treguar një qëndrueshmëri relative të sektorit. Disa kompani kanë arritur madje të përfitojnë nga situata, duke devijuar trafikun drejt tregjeve alternative.
Ekspertët vlerësojnë se industria e aviacionit është sot më fleksibël dhe më e përgatitur për të përballuar kriza të tilla, por paralajmërojnë se nëse konflikti vijon, presioni mbi çmimet dhe furnizimin me karburant mund të përshkallëzohet, duke rrezikuar sezonin veror të udhëtimeve. /reuters
