Çmimet e naftës kanë shënuar një korrigjim të lehtë pas një rritjeje disa ditore, ndërsa tregjet po reflektojnë zhvillimet e fundit gjeopolitike dhe vendimin surprizë të Emirateve të Bashkuara Arabe për t’u larguar nga OPEC.
Nafta Brent për kontratat e qershorit u tregtua rreth 111.25 dollarë për fuçi, pothuajse e pandryshuar, pas shtatë ditësh rritje radhazi. Ndërkohë kontrata më aktive për korrikun ka shënuar një rënie më të dukshme, duke reflektuar një korrigjim të përkohshëm në treg.
Analistët vlerësojnë se vendimi i Emirateve për të dalë nga OPEC mund të rrisë ofertën në të ardhmen, pasi vendi nuk do të jetë më i kufizuar nga kuotat e prodhimit. Megjithatë, ky efekt nuk pritet të ndihet në afat të shkurtër për shkak të bllokadës në Ngushticën e Hormuzit, e cila vazhdon të kufizojë furnizimin global.
Situata mbetet e tensionuar për shkak të konfliktit të ngrirë mes SHBA-së, Izraelit dhe Iranit. Irani ka mbyllur Ngushticën e Hormuzit, një rrugë kyçe për rreth 20% të furnizimit global me naftë dhe gaz natyror të lëngshëm, ndërsa SHBA ka vendosur bllokadë ndaj porteve iraniane, duke rritur më tej presionin mbi tregun.
Raportimet tregojnë se administrata amerikane po shqyrton zgjatjen e bllokadës, çka mund të përkeqësojë ndërprerjet e furnizimit dhe të mbajë çmimet në nivele të larta.
Në të njëjtën kohë, të dhënat nga tregu amerikan tregojnë për rënie të rezervave për të dytën javë radhazi. Stoqet e naftës kanë rënë me rreth 1.79 milionë fuçi, ndërsa rezervat e benzinës dhe produkteve të tjera të rafinuara kanë shënuar rënie edhe më të fortë.
Këto zhvillime konfirmojnë se, pavarësisht luhatjeve të përditshme, tregu i naftës mbetet i tensionuar dhe i ndjeshëm ndaj zhvillimeve gjeopolitike, me rrezikun që çmimet të mbeten të larta nëse kriza në Hormuz vijon. /reuuters
