Sipas mediave greke, bëhet fjalë për fluturimin LH1753 nga Athina drejt Mynihut, i cili u ngrit në orën 18:19, por brenda pak minutash ekuipazhi kërkoi rikthim emergjent në aeroport sipas protokolleve të sigurisë ajrore.
Avioni u ul sërish në pistë në orën 18:35, ndërsa menjëherë u aktivizuan procedurat e emergjencës në aeroport. Pasagjerët u evakuuan nga daljet emergjente duke përdorur edhe rrëshqitëset e posaçme të sigurisë.
Airbus A321neo konsiderohet një nga avionët më modernë të flotës europiane për fluturime me distancë të mesme, me motorë të rinj dhe konsum më të ulët karburanti, ndërsa përdoret gjerësisht nga Lufthansa në linjat brenda Europës.
Sipas raportimeve paraprake, shkak i incidentit dyshohet të ketë qenë një defekt në motor, ndërsa pritet edhe një reagim zyrtar nga kompania ajrore për të sqaruar rrethanat e plota të ngjarjes.
Disa pasagjerë kanë deklaruar se nuk morën informacion nga ekuipazhi gjatë momentit të emergjencës, edhe pse nga dritaret e avionit shihnin mjetet zjarrfikëse që afroheshin drejt pistës. Ata treguan gjithashtu se në avion u hapën edhe dyert speciale të sigurisë për evakuimin emergjent. /skyweb.al
