Avokati i Ergys Agasit, Maks Haxhia, është paraqitur në Prokurorinë e Posaçme për tërheqjen e dokumentacionit që lidhet me dosjen penale ndaj klientit të tij, ndërsa jashtë ambienteve të SPAK ka dhënë sqarime për mediat mbi akuzat dhe qëndrimin e mbrojtjes.
Ergys Agasi ndodhet aktualisht në kërkim nga SPAK dhe akuzohet për përfshirje në skema manipulimi të tenderave të AKSHI-t, jo vetëm përmes dokumentacionit, por edhe përmes ushtrimit të dhunës. Megjithatë, avokati Haxhia deklaroi se klienti i tij ndodhet jashtë Shqipërisë për një takim pune dhe se sapo të kthehet do të paraqitet vetë përballë drejtësisë.
Sipas tij, Agasi është duke negociuar një marrëveshje biznesi dhe nuk po i shmanget procesit penal. Haxhia theksoi se vetëdorëzimi do të ndodhë menjëherë pas kthimit të tij në vend, duke shtuar se klienti i tij do të mbajë qëndrimin e vet përpara SPAK.
I pyetur për verërat me vlerë rreth 3 milionë euro dhe për përfitime të mundshme nga tenderat e AKSHI-t, Haxhia deklaroi se kjo çështje po përdoret politikisht. Ai tha se Agasi po trajtohet në publik si një figurë shtetërore, ndërkohë që sipas tij nuk ka ushtruar asnjë detyrë publike dhe nuk ka qenë pjesë e administratës.
Avokati shtoi se kontrollet e ushtruara në banesë dhe publikimi i tyre në media do të ndiqen në rrugë ligjore, duke argumentuar se klienti i tij ka biznesin e vet privat dhe nuk ka kryer asnjë vepër penale. Sipas Haxhias, veprimtaritë e Agasit nuk përputhen me ato të AKSHI-t dhe ai nuk ka përfituar asnjë tender që lidhet me fondet publike apo me financat e shtetit.
Në lidhje me akuzat e SPAK se Agasi fshihet pas marrjes peng të biznesmenit Gerond Meçe, mbrojtja i ka mohuar këto pretendime. Haxhia deklaroi se nuk ekziston asnjë provë që Ergys Agasi të jetë marrë me tendera apo që të ketë lidhje me këtë person, duke theksuar se klienti i tij nuk e njeh Gerond Meçen.
Nga ana tjetër, SPAK akuzon Ergys Agasin dhe Ermal Beqirin se kanë përfituar dhjetëra milionë euro nga tenderat publikë të AKSHI-t, me ndihmën e ish-drejtueses së këtij institucioni, Mirlinda Karçanaj. Sipas prokurorisë, përmes presioneve, dhunës dhe manipulimeve dokumentare, janë paracaktuar kompanitë fituese të lidhura me ta, ndërsa hetimet për këtë dosje vijojnë. /skyweb.al
