Kosova ka blerë dronë pa pilot AeroVironment RQ-20 Puma nga Shtetet e Bashkuara të Amerikës. Lajmi është konfirmuar nga ministri në detyrë i Mbrojtjes, Ejup Maqedonci.
Përmes një postimi në Facebook, Maqedonci tha se dronët janë blerë përmes programit shtet më shtet dhe se pagesa është realizuar në vitin 2021.
Ministry nuk ka dhënë detaje se për sa dronë bëhet fjalë. Megjithatë, sipas raportimeve nga mediat amerikane, Kosova ka porositur 40 njësi të këtyre mjeteve dhe vlera e tyre vlerësohet të jetë 11.1 milionë dollarë apo 215 mijë për njësi.
“Fluturaket Puma krahas fluturakeve tjera janë një kapacitet tjetër i nevojshëm për rritjen e aftësive të FSK-së në fushën e sistemeve ajrore pa pilot”, shkroi ndër të tjera Maqedonci.
Lajmi për dronët vjen disa javë pasi Forca e Sigurisë së Kosovës (FSK) pranoi autoblinda të blerë nga SHBA-ja, shkruan Skyeweb.al.
Maqedonci ka theksuar se bashkëpunimi me SHBA-në në fushën e mbrojtjes po thellohet dhe zgjerohet vazhdimisht dhe ky bashkëpunim, i kontribuon interesave të përbashkëta të të dyja vendeve.
Kosova synon të blerë edhe mjete të tjera ushtarake në vijim nga SHBA, përfshirë raketat Javelin.
Në një marrëveshje të pak muajve më parë, Kosova, Shqipëria dhe Kroacia kanë rënë dakord për blerjet e përbashkëta të armëve amerikane, me qëllim forcimin dhe modernizimin e ushtrisë. /Skyweb.al
