Shqiptarët po preferojnë gjithnjë e më shumë depozitat afatgjata për të ruajtur kursimet e tyre.
Të dhënat më të fundit nga Banka e Shqipërisë tregojnë se pjesa më e madhe e qytetarëve mbajnë paratë në depozita me afat mbi 2 vite, duke i konsideruar ato si mënyrën më të sigurt për të mbrojtur kursimet dhe për të siguruar një fitim më të lartë nga interesat.
Depozitat afatgjata përdoren kryesisht nga qytetarët që planifikojnë përdorimin e kursimeve në një periudhë më të largët, si për fëmijët, shëndetin, blerjen e një shtëpie apo ngritjen e një biznesi.
Këto depozita ofrojnë norma më të larta interesi dhe, sa më i gjatë të jetë afati dhe sa më e madhe shuma, aq më i lartë bëhet përfitimi në vite.
Statistikat e Bankës së Shqipërisë tregojnë se depozitat në lekë me afat mbi 2 vite kapin vlerën 167.4 miliardë lekë, duke kryesuar bindshëm. Në vend të dytë renditen depozitat me afat 1 vit me 124.7 miliardë lekë, ndërsa ato deri në 2 vitearrijnë 49.5 miliardë lekë.
Në terma rritjeje, depozitat me afat 2 vite kanë shënuar ritmin më të lartë në tetor, me një rritje rekord prej 3.7%krahasuar me shtatorin. Pas tyre vijnë depozitat me afat 1 muaj, të cilat janë rritur me 1.5%, ndërsa kursimet pa afat kanë shënuar rritje prej 1.2%. Më pak të preferuarat rezultojnë depozitat me afat 1 vit, të cilat janë rritur me vetëm 0.1%.
Depozitat mbeten forma kryesore e investimit të parave të shqiptarëve, pavarësisht se tregu ofron tashmë mundësi të tjera, si investime në tituj qeveritarë, kripto ose instrumente financiare të ngjashme. Për shumicën e qytetarëve, siguria dhe stabiliteti i depozitave në bankë vijojnë të jenë arsyeja kryesore e këtij orientimi.
