Një studim i publikuar këtë javë në revistën “BMJ Mental Health” tregon se konsumimi i tre deri në katër filxhanëve kafe në ditë mund të ngadalësojë plakjen biologjike tek personat me sëmundje të rënda mendore.
Ndryshe nga mosha kronologjike, plakja biologjike mat gjendjen e qelizave dhe organeve, e cila ndikohet nga faktorë si gjenetika, stili i jetës, ekspozimi mjedisor dhe dieta – përfshirë edhe sasinë e kafesë që konsumojmë.
Studimi zbuloi se, krahasuar me personat që nuk pinë kafe, konsumatorët mund të fitojnë rreth pesë vite biologjike shtesë. Katër filxhanë prej 225 gramësh përputhen me sasinë e rekomanduar ditore të kafeinës për të rriturit, sipas Administratës së Ushqimit dhe Barnave.
Hulumtuesit sugjerojnë se kafeja mund të ndikojë pozitivisht në procesin e plakjes duke ulur stresin oksidativ – një gjendje në të cilën bie ekuilibri midis antioksidantëve dhe radikaleve të lira që dëmtojnë qelizat dhe ADN-në. Stresi oksidativ lidhet me shkurtimin e telomereve, kapakëve mbrojtës të kromozomeve që parandalojnë dëmtimet e tyre.
Telomeret e shkurtuara janë shenjë e plakjes biologjike dhe shfaqen më shpesh tek personat me çrregullime të rënda mendore, si skizofrenia apo çrregullimi bipolar. Këta individë zakonisht kanë jetëgjatësi më të shkurtër, deri në 15 vjet më pak se bashkëmoshatarët pa çrregullime të tilla.
Në studim morën pjesë më shumë se 400 të rritur norvegjezë me skizofreni, çrregullim bipolar ose çrregullim depresiv të madh me psikozë. Ata u ndanë në grupe sipas sasisë së kafesë që konsumonin. Analizat e gjakut treguan ndryshime të dukshme në gjatësinë e telomereve midis atyre që nuk pinin fare, atyre që pinin një deri në dy filxhanë, tre deri në katër filxhanë, ose pesë ose më shumë në ditë.
Rezultatet treguan se tre deri në katër filxhanë kafe në ditë lidhen me telomere më të gjata, ndërsa konsumimi i më shumë se pesë filxhanëve nuk pati efekt pozitiv.
Sipas studiuesve, kafeja përmban përbërës të fuqishëm antioksidantë dhe anti-inflamatorë që mund të ngadalësojnë proceset qelizore të plakjes. Megjithatë, ata paralajmërojnë se tejkalimi i sasisë së rekomanduar të kafesë mund të shkaktojë dëmtime qelizore dhe shkurtim të telomereve përmes rritjes së specieve reaktive të oksigjenit. /Skyweb.al
