Autoriteti i Konkurrencës pritet të hapë një hetim për tregun e sigurimeve në Shqipëri, duke e vendosur këtë sektor në qendër të vëmendjes institucionale për shkak të dyshimeve mbi funksionimin e konkurrencës.
Kreu i Komisionit të Konkurrencës, Denar Biba, ka konfirmuar se tregu i sigurimeve do të jetë së shpejti objekt hetimi, duke iu përgjigjur kërkesave të përsëritura nga Komisioni Kuvendor për Ekonominë, Financat dhe Punësimin, por pa dhënë detaje të mëtejshme mbi shtrirjen apo kohëzgjatjen e procesit.
Në fokus të diskutimeve ka qenë veçanërisht tregu i sigurimit të detyrueshëm motorik për përgjegjësitë ndaj palëve të treta, një segment që prej kohësh ngre pikëpyetje mbi nivelin real të konkurrencës.
Një projektrezolutë e hartuar vitin e kaluar nga Komisioni i Ekonomisë, edhe pse nuk u miratua nga Kuvendi, kërkonte hetim me prioritet të produkteve TPL dhe Karton Jeshil. Dokumenti parashikonte analizimin e praktikave që mund të kenë ndikuar në kufizimin e konkurrencës dhe në fiksimin e çmimeve, si dhe mënyrën e shkëmbimit të informacionit mes operatorëve të tregut.
Sipas projektrezolutës, hetimi duhet të përfshijë edhe verifikimin e ndikimit të këtij shkëmbimi informacioni në sjelljen tregtare të kompanive të sigurimit, si dhe të identifikojë çdo mekanizëm që mund të çojë në koordinim çmimesh apo ndarje tregu.
Një tjetër element i ngritur është ekzistenca e mundshme e platformave digjitale apo algoritmeve që mund të përdoren për koordinimin e çmimeve dhe shpërndarjen e të ardhurave mes kompanive, çka nëse provohet do të përbënte një shkelje të rëndë të konkurrencës.
Nga ana tjetër, Autoriteti i Mbikëqyrjes Financiare ka mbajtur një qëndrim më të rezervuar. Në një deklarim të mëparshëm për Monitor, AMF vlerësonte se tregu i sigurimit të detyrueshëm motorik shfaq një nivel të pranueshëm të konkurrencës, duke theksuar se natyra e rregulluar dhe e standardizuar e këtij produkti ndikon në mënyrën si funksionon tregu.
Sipas AMF-së, pavarësisht këtyre karakteristikave, ekziston presion konkurrues mes shoqërive të sigurimit, megjithatë vlerësimi përfundimtar mbi sjelljet anti-konkurruese mbetet kompetencë ekskluzive e Autoritetit të Konkurrencës.
Tregu i sigurimit TPL nuk është për herë të parë nën vëzhgim. Edhe në të kaluarën ai ka qenë objekt hetimi, por problematikat e evidentuara janë adresuar kryesisht përmes rekomandimeve ndaj Autoritetit të Mbikëqyrjes Financiare.
Hetimi i ri pritet të japë një panoramë më të qartë mbi funksionimin real të këtij tregu dhe nëse praktikat e ndjekura nga operatorët kanë cenuar konkurrencën dhe interesat e konsumatorëve.
