Revista prestigjioze “Forbes” i ka kushtuar një artikull të gjatë Diellës, ministres virtuale të Shqipërisë, duke e cilësuar si një revolucion global në qeverisje dhe në luftën kundër korrupsionit.
Madje “Forbes” guxon duke thënë se Diella nuk është më një ide apo projekt eksperimental, por një sistem që tashmë funksionon në praktikë, duke shënuar një moment historik për administratën publike shqiptare!
Roli i saj i shpallur është i qartë, të ruajë tenderët nga ndikimi njerëzor dhe të garantojë transparencë të plotë në prokurimet publike, një fushë ku prej vitesh është kërkuar reformë e thellë.
Megjithatë, entuziazmi nuk është i pandarë nga skepticizmi. Deri më tani kemi parë se Diella po përdoret më shumë për të kapur titujt e mediave ndërkombëtare, sesa për të ndërtuar një sistem të qëndrueshëm e të besueshëm.
Aktualisht, Diella funksionon si një chatbot inteligjent, pa një infrastrukturë mbështetëse që të garantojë integritet, auditim apo kontroll njerëzor në proceset që pretendon të automatizojë.
Nëse sistemi do të marrë për bazë praktikat aktuale të prokurimeve, ekziston rreziku real që Diella të përfundojë duke e futur korrupsionin në një shkallë më të avancuar, përmes automatizimit të procedurave të ndikuara dhe mungesës së përgjegjësisë. /skyweb.al
