Ndryshimet e ditëve të fundit në Policinë e Shtetit kanë prekur një numër të madh drejtuesish, të cilët janë shkarkuar ose kanë dhënë dorëheqjen në kuadër të ristrukturimit të nisur nga kreu i ri i Policisë së Shtetit, Skënder Hitaj.
Ky proces është paraqitur si një përpjekje për të pastruar strukturat e policisë nga njerëzit e lidhur me ish drejtuesin Ilir Proda, i larguar në duje pas ngjarjes te vila e Enver Hoxhës.
Megjithatë, duket shkaqet reale të shkarkimit të tij lidhen më shumë me dosjen e SPAK për skandalin AKSHI dhe njerëzit me të cilët ai zgjodhi të drejtojë Policinë e Shtetit, ku sipas raportimeve te ndryshme mediatike ishin emërime në fakt të personave që sipas Prokurorisë së Posaçme drejtonte edhe grupin e Agjencisë Kombëtare të Shoqërisë së Informacionit.
Pavarësisht “tërmetit” në polici, një nga drejtueset më të rëndësishme në Policinë e Shtetit vijon të mbetet në detyrë. Bëhet fjalë për Ervina Gjanën, Drejtore e Drejtorisë për Hetimet e Krimeve Kibernetike në Drejtorinë e Përgjithshme të Policisë së Shtetit.
Gjana mbetet e paprekshme për Skënder Hitajn, një drejtues që ka treguar deri më tani se nuk i mungon dinjiteti dhe guximi, edhe pse bashkëshorti i saj, Renato Hrstic, është nën hetim si shoqërues i Ergys Agasit,ndërsa GJKKO ka urdhëruar sekuestrimin e pajisjeve elektronike.
Agasi, së bashku me Ermal Beqirin, dyshohet nga SPAK si një nga krerët e grupit kriminal që orientonte tenderët e AKSHI, duke paracaktuar fituesit dhe duke fryrë kostot me qëllim përfitimin.
Sipas dyshimeve të SPAK, paratë e përfituara më pas shpërndaheshin përmes skemave të ndryshme, mes të cilave edhe faturimet fiktive.
Në këtë sfond, fakti që bashkëshorti i një drejtueseje të rëndësishme të Policisë së Shtetit del si shoqërues i një prej personave më të kërkuar nga SPAK, duket se nuk përbën më lajm në Shqipëri.
Përkundrazi, në morinë e anormaliteteve që kanë përfshirë institucionet, raste të tilla rrezikojnë të trajtohen si normalitet.
Ndërkohë që Skënder Hitaj ka vendosur nën kontroll një pjesë të mirë të drejtorive të Policisë së Shtetit, Ervina Gjana duket se mbetet jashtë këtij procesi.
Ajo konsiderohet si një nga njerëzit e besuar të Ilir Prodës, ndërsa në kuadër të hetimeve të SPAK janë sekuestruar tetë pajisje elektronike.
Ndërkohë SPAK po vijon hetimet për skandalin AKSHI dhe gjasat janë që të ketë siguruar të dhëna të tjera kompromentuese në emër të Ervina Gjanës, të cilat mund të konfirmojnë dyshimet për shërbimet ndaj Ergys Agasit përmes informacionit apo goditjes ndaj personave/ bizneseve që atij i “prishnin punë”.
Gjata u përpoq të bënte një operacion PR ndaj vetes me aksionet ndaj Call Centerave mashtrues, por mbetet për t’u parë nëse kjo do ta shpëtojë nga SPAK, po ashtu edhe shefin e saj aktual nga trokitja e BKH-së ndonjë diitë me diell në derën e vartëses ende në detyrë. /skyweb.al
