“Glosarij”, kompania malazeze e akuzuar si “grup kriminal” që synon tregun farmaceutik të Kosovës
Një kompani farmaceutike e njohur në Mal të Zi për skandale dhe akuza të shumta, po synon të zgjerohet edhe në Kosovë. Bëhet fjalë për “Glosarij”, një emër i lidhur prej dekadash me monopolin në tregun e barnave në shtetin fqinj dhe i cilësuar nga mediat malazeze si “grup i organizuar kriminal në sektorin e shëndetësisë”.
Themeluar në vitin 1992 nga biznesmeni kontrovers Branislav Brano Martinoviq, kompania arriti të zhdukë rreth 20 konkurrentë në tregun malazez, duke marrë kontrollin pothuajse të plotë mbi barnat dhe pajisjet mjekësore. Sot, menaxhmenti i saj drejtohet nga Mirjana Mijuskoviq (drejtoreshë ekzekutive), Milosh Martinoviq (drejtor financiar) dhe Goran Martinoviq (drejtor marketingu).
Në Malin e Zi, “Glosarij” ka operuar me disa kompani satelite të ngjashme, të drejtuara nga djemtë e Martinoviqit, të cilat më pas u mbyllën, duke përforcuar akuzat për praktika të dyshimta tregtare. Kompania është përmendur edhe në afera të rënda si kontrabanda e citostatikëve ilegalë nga Italia, që humbnin efektivitet gjatë ripaketimit, por shiteshin në treg me çmime të larta.
Skandalet nuk ndalen këtu. “Glosarij” ka qenë e lidhur me regjistrimin dhe më pas ndalimin e importit të Fentanylit – një opioidi tepër të fuqishëm dhe të rrezikshëm, i cili përveç përdorimit mjekësor, gjendej edhe në tregun ilegal të Malit të Zi dhe u bë shkaktari i shumë mbidozave fatale. Ndërkohë, lidhje financiare janë dokumentuar edhe me ish-kryeprokurorin special të Malit të Zi, Milivoje Katniq, i arrestuar më vonë për shpërdorim detyre.
Kontrolli që “Glosarij” ka ushtruar mbi tregun farmaceutik malazez për më shumë se 20 vjet, i ka sjellë fitime miliardëshe. Sipas raporteve, vetëm në vitin 2019 tregu farmaceutik i Malit të Zi arrinte në 200 milionë euro, dhe pjesa më e madhe e këtij tregu kontrollohej nga kjo kompani.
Tani, e njëjta kompani kërkon të hyjë në tregun e Kosovës, përmes një multinacionaleje, ende të paqartë se si ka marrë aprovimin për distribuimin e barnave. Rreziku, sipas mediave malazeze, është se hyrja e saj do të minonte konkurrencën e ndershme dhe do të rrezikonte sigurinë e pacientëve.
Mbetet për t’u parë nëse autoritetet kosovare do ta lejojnë “Glosarij” të operojë, por nëse zbatohen ligjet në fuqi, ekspertët theksojnë se një kompani e tillë nuk duhet të marrë licencë. Përndryshe, Kosova do të përballej me të njëjtat praktika abuzive dhe kriminale që kanë shënjuar sektorin e shëndetësisë në Mal të Zi. /indeksonline
