Ministria e Financave dhe Ekonomisë do të zhvillojë një ankand për emetimin e bonove të Thesarit njëvjeçare në vlerë totale prej 6.8 miliardë lekësh ose rreth 70 milionë euro.
Sipas njoftimit zyrtar të publikuar nga Banka e Shqipërisë, nga kjo shumë 2.3 miliardë lekë janë të rezervuara për Bankën Qendrore, ndërsa pjesa tjetër do të vihet në dispozicion të institucioneve financiare pjesëmarrëse në treg.
Më herët, ministri i Financave sugjeroi edhe pjesëmarrjen e qytetarëve në financimin e borxhit të qeverisë.
Emetimi i këtyre titujve do të kryhet më 28 gusht 2025, ndërsa maturimi është parashikuar për 27 gusht 2026.
Ankandi do të zhvillohet sipas procedurës me shumë çmime, që do të thotë se ofertuesit mund të pranojnë norma interesi të ndryshme në bazë të ofertave të paraqitura.
Ky është ankandi i radhës në kuadër të kalendarit tremujor të emetimeve të borxhit publik, që ka për qëllim mbulimin e nevojave buxhetore dhe menaxhimin e likuiditetit të qeverisë. /skyweb.al
