Një anije e fundosur që nga koha e Perandorisë Romake është zbuluar në det pranë qytetit Mazara del Vallo, në Siçili.
Anija ndodhet rreth tre milje larg bregut dhe 46 metra nën ujë, ndërsa arkeologët besojnë se ajo daton nga periudha mes shekullit II dhe I para Krishtit, pra rreth 2 mijë vjet më parë.
Rreth rrënojave të anijes janë gjetur qindra amfora romake, enë të mëdha që në atë periudhë përdoreshin për transportimin e produkteve nëpër Mesdhe. Në fund të detit janë identifikuar gjithashtu pjesë të spirancave prej plumbi.
Ministri italian i Kulturës, Alessandro Giuli, e cilësoi gjetjen si një nga zbulimet më të rëndësishme arkeologjike nënujore të viteve të fundit.
Sipas tij, anija mund të ndihmojë studiuesit të kuptojnë më mirë rrugët detare dhe tregtinë që zhvillohej në Mesdhe gjatë periudhës romake.
Zbulimi u bë nga njësitë e specializuara të Karabinierëve dhe arkeologët e rajonit të Siçilisë, pas një informacioni të dhënë nga qytetarët.
Zona do të vazhdojë të studiohet dhe dokumentohet, ndërsa autoritetet italiane do të marrin masa për mbrojtjen e saj.
Gjetja vjen vetëm pak ditë pas një tjetër zbulimi të pazakontë pranë Siçilisë, ku afër ishullit Panarea u identifikua nën det një krater rreth 100 metra i gjatë dhe 60 metra i gjerë, së bashku me burime të reja hidrotermale.
