Kryeministri Edi Rama ka bërë të ditur se në Shqipëri ka nisur prodhimi i 14 automjeteve të reja zjarrfikëse nga kompania TIMAK, në kuadër të planit për modernizimin e flotës së shërbimit zjarrfikës në vend.
Sipas Ramës, objektivi është krijimi i një flote të unifikuar, që do të mbulojë nevojat e Republikës së Shqipërisë sipas standardeve të vendeve anëtare të NATO-s dhe Bashkimit Europian.
Kreu i qeverisë u shpreh se aktualisht vendi disponon një flotë zjarrfikësesh, por ajo mbetet e pamjaftueshme për nevojat e territorit. Ai theksoi se prodhimi i 14 mjeteve njëkohësisht përbën një zhvillim të rëndësishëm, duke shtuar se një numër i tillë nuk ishte realizuar gjatë 14 viteve të fundit.
Rama tha se qeveria synon të shmangë blerjet e fragmentuara përmes tenderëve të ndryshëm dhe të ndërtojë një flotë të standardizuar, në të njëjtën logjikë me modernizimin e flotës së Forcave të Armatosura.
Sipas tij, Shqipëria do të pajiset me numrin e nevojshëm të automjeteve zjarrfikëse, të përcaktuara në bazë të popullsisë, territorit dhe kilometrave që duhet të mbulohen, në përputhje me standardet e NATO-s dhe Bashkimit Europian.
