Në Shqipëri kanë hyrë në fuqi rregullat e reja për funksionimin e kantierëve të ndërtimit, të publikuara në Fletoren Zyrtare. Sipas rregullores, një kantier konsiderohet i ngritur vetëm kur është i rrethuar, ka sinjalistikën përkatëse, të paktën katër kamera sigurie që mbulojnë të gjitha këndet dhe tabela informuese me të dhënat e objektit dhe subjektit ndërtues.
Inspektorati Kombëtar i Mbrojtjes së Territorit (IKMT) dhe Agjencia e Zhvillimit të Territorit (AZHT) do të kenë akses në kamerat e sigurisë, për të verifikuar nëse punimet zhvillohen në përputhje me lejen e ndërtimit. Po ashtu, të gjitha mjetet e kantierit duhet të pajisen me GPS funksional, të monitorueshëm nga të njëjtat institucione.
Tabelat informuese do të përmbajnë të dhëna si numri i lejes së ndërtimit, sipërfaqja, afati i punimeve, numri i njësive të banimit dhe një numër kontakti. Në rast se rrethimi ose imazhet e tij dëmtohen, zhvilluesi është i detyruar t’i rinovojë brenda një jave.
Rregullorja parashikon gjithashtu detyrimin për të garantuar sigurinë e punëtorëve, duke përfshirë vendosjen e skelave mbrojtëse, pajisjeve të sigurisë, mbrojtjen nga rrymat elektrike dhe mirëmbajtjen e makinerive. Drejtuesi teknik duhet të pezullojë punën nëse masat mbrojtëse mungojnë, ndërsa mbikëqyrësi i punimeve ka detyrimin të njoftojë për çdo defekt dhe afatin e korrigjimit. /skyweb.al
