Lufthansa po përballet me një nga javët më të vështira në historinë e saj të fundit, pasi grevat e njëpasnjëshme kanë paralizuar operacionet në aeroportet kryesore. Në vetëm 7 ditë, kompania është goditur nga 5 ditë protesta, me pilotë dhe stjuardë që alternohen në aksione sindikale pa ndërprerje.
Më 10 prill, greva e sindikatës së stjuardëve çoi në anulimin e rreth 920 fluturimeve, duke prekur afro 100 mijë pasagjerë.
Situata u përkeqësua më tej më 13 dhe 14 prill, kur pilotët e sindikatës Vereinigung Cockpit hynë në grevë, duke sjellë anulimin e 80 deri në 90% të fluturimeve dhe duke lënë mbi 50 mijë pasagjerë në tokë. Aeroportet kryesore si Frankfurti dhe Mynihu funksionuan në kushte minimale.
Grevat nuk ndalen këtu. Më 15 dhe 16 prill, pritet një tjetër valë protestash nga stjuardët, duke rritur më tej pasigurinë për udhëtarët dhe presionin mbi kompaninë.
Dy konfliktet kanë shkaqe të ndryshme. Pilotët kundërshtojnë reformën e pensioneve, përmes së cilës Lufthansa synon të kalojë nga një sistem me përfitim të garantuar në një sistem me kontribute të përcaktuara, duke transferuar rrezikun financiar tek punonjësit.
Nga ana tjetër, stjuardët kërkojnë përmirësim të kushteve të punës dhe një plan social për rreth 800 punonjës të CityLine, degë e kompanisë që pritet të mbyllet.
Sindikatat akuzojnë drejtuesit e kompanisë për mungesë vullneti për dialog, ndërsa Lufthansa argumenton se grevat po rëndojnë më tej një kompani që tashmë përballet me vështirësi financiare dhe renditet ndër më pak fitimprurëset në grup.
Kriza po zhvillohet në një moment simbolik për kompaninë, në prag të festimeve për 100-vjetorin e saj, ku pritet edhe prania e kancelarit gjerman.
Sindikatat kanë paralajmëruar se protestat do të vazhdojnë edhe gjatë këtij eventi, duke rritur tensionin mes palëve. /skyweb.al
