Bllokimi i aksit rrugor Librazhd-Përrenjas pas rrëshqitjes së dherave ka goditur drejtpërdrejt lëvizjen turistike drejt juglindjes, duke sjellë rënie të menjëhershme të fluksit në Korçë, Dardhë dhe Pogradec.
Qytetet që zakonisht mbushen me vizitorë për fundjavë po përballen me anulime dhe mungesë rezervimesh të reja, ndërsa bizneset e turizmit raportojnë një situatë të pazakontë për këtë periudhë të vitit.
Operatorët turistikë dhe strukturat akomoduese theksojnë për Monitor se izolimi i përkohshëm i zonës ka zgjatur ndjeshëm kohën e udhëtimit dhe ka krijuar pasiguri te vizitorët, duke ndikuar kryesisht në turistët vendas që përbëjnë pjesën më të madhe të klientelës.
Rrugët alternative konsiderohen më të gjata dhe më të kushtueshme, çka ka frenuar lëvizjen spontane të fundjavës drejt juglindjes.
Ndikimi nuk është ndjerë vetëm në sektorin e turizmit. Vështirësitë në transport kanë prekur edhe furnizimin me produkte ushqimore, duke sjellë mungesë mallrash në treg dhe rritje të çmimeve të zarzavateve në Pogradec, me shtrenjtim që në disa raste arrin deri në 50 për qind.
Situata ka reflektuar edhe në transportin e pasagjerëve, ku çmimet e biletave në linjën Tiranë-Korçë janë rritur ndjeshëm, për shkak të devijimeve dhe kostove më të larta të udhëtimit.
Bizneset dhe tregtarët presin që normalizimi i fluksit të ndodhë vetëm pas rikthimit të qarkullimit në aksin kryesor, i cili mbetet nyja kryesore lidhëse e juglindjes me pjesën tjetër të vendit. /skyweb.al
