Pas pandemisë, shumë kompani kanë kërkuar që punonjësit të kthehen fizikisht në zyrë – të paktën disa ditë në javë. Por a përmirëson kjo vërtet kulturën e kompanisë, apo thjesht dëmton moralin e stafit?
CEO i Uber, Dara Khosrowshahi, u shpreh kohët e fundit se kërkesa për të punuar tre ditë në javë nga zyra nuk lidhet vetëm me produktivitetin: “Bëhet fjalë për ndërtimin e kulturës që do të shtyjë fazën tjetër të rritjes së Uber.” Në të njëjtën linjë, Amazon riktheu normën e parakohshme të punës me kohë të plotë në zyrë që prej janarit. “Njerëzit ndërtojnë më mirë idetë kur janë fizikisht bashkë,” argumentoi CEO Andy Jassy.
Hulumtimet e ndryshme vërtetojnë se kultura organizative ka ndikim në inovacion, fitim dhe performancën në bursë. Por analiza e të dhënave sugjeron se puna nga zyra nuk është domosdoshmërisht përmirësuese e kulturës së kompanisë, dhe për disa organizata, mund të jetë edhe e kundërta.
Një studim i 61,000 punonjësve të Microsoft tregoi se puna në distancë krijon izolim dhe ul dinamizmin. Por, nga ana tjetër, kërkimi nga Universiteti i Pittsburgh vuri në dukje se kompanitë që i kthyen punonjësit me detyrim në zyrë pas pandemisë, pësuan rënie të kënaqësisë në punë dhe rritje të dorëheqjeve, pa ndonjë përmirësim në performancën e përgjithshme.
Në një analizë të përbashkët të të dhënave nga CultureX (me feedback nga 900 kompani në Glassdoor) dhe Flex Index(që kategorizon politikat e punës në distancë për mbi 13,000 kompani), rezultoi se kompanitë që kërkojnë 5 ditë punë nga zyra vlerësohen më mirë për “agilitet” – aftësinë për të reaguar shpejt ndaj ndryshimeve në treg.
Por në matjet e tjera, si mbështetja ndaj punonjësve, cilësia e lidershipit, balanca punë-jetë, sinqeriteti dhe niveli i toksicitetit, kompanitë më fleksibël fituan më shumë pikë. Në disa raste, kompanitë që detyrojnë punën fizike në zyrë rezultojnë gjithashtu më pak të ndjeshme ndaj kërkesave të stafit dhe më tolerante ndaj sjelljes negative në ambientin e punës.
Sipas Don Sull të MIT Sloan, kompanitë që rezultojnë shumë të shkathëta (si Nvidia, Tesla dhe SpaceX) bëjnë një marrëveshje të heshtur me punonjësit: rroga të larta, mundësi karriere, por sakrifica në jetën personale.
Ndërsa fuqia e tregut të punës po kthehet në duart e punëdhënësve, shumë drejtues mund të kërkojnë kthim të plotë në zyrë me justifikimin e “përmirësimit të kulturës”. Por të dhënat tregojnë se ky kthim ka kosto sociale dhe psikologjike për stafin, që nuk mund të injorohen lehtë. /TheEconomist
