Prokuroria e Posaçme kundër Korrupsionit dhe Krimit të Organizuar (SPAK), në bashkëpunim me EUROPOL dhe autoritetet ligjzbatuese të Belgjikës, Francës, Gjermanisë, Holandës dhe Italisë, ka goditur një organizatë kriminale shqiptare me ndikim ndërkombëtar, e përfshirë në trafikimin e kokainës dhe pastrimin e të ardhurave nga veprimtaria kriminale.
Hetimet janë zhvilluar në kuadër të procedimit penal nr. 187/2023 dhe janë bazuar në analizën e komunikimeve të koduara përmes aplikacionit SkyECC.
Kjo organizatë, e strukturuar dhe me shtrirje globale, kishte organizuar trafikun e dy super-ngarkesave me gjithsej 28 ton kokainë, të nisura nga Paraguaji drejt porteve të Anversit në Belgjikë dhe Hamburgut në Gjermani. Grupi kishte bashkëpunime me prodhues në Amerikën Latine dhe kishte ngritur një sistem të sofistikuar transporti, fshehjeje të drogës dhe pastrimi parash, ku përdoreshin kontejnerë me mallra të legalizuara dhe rrjete pagesash të pashënueshme, si “hawala” apo transport fizik me shoferë të përzgjedhur autobusësh.
Emrat e personave nën hetim
Nga hetimet e kryera, SPAK ka identifikuar 16 shtetas shqiptarë si pjesë të kësaj organizate kriminale. Gjykata e Posaçme ka caktuar masën “arrest me burg” për 14 prej tyre dhe “detyrim paraqitje” për dy të tjerë. Mes emrave të njohur përfshihen edhe persona të arrestuar më herët jashtë vendit.
Anëtarët e grupit kriminal të përfshirë që GJKKO dha masën arrest me burg:
•Riza Çela
•Ardian Çela
•Albin Çela
•Elvis Çela (katër vëllezër)
•Fadil, alias Jul Balla – pronar i “Ajman Resort”
•Franc Çopja – i arrestuar në Belgjikë
•Petrit Sulejmani, alias “Lakatos”
•Mariglen Kamami
•Denis Daja
•Renato Musaka
•Vilson Pepa
•Miklovan Mullai
•Gert Çerma
Gjithashtu, SPAK ka urdhëruar kontroll edhe në ambientet e “Klajdi Resort”, ku është sekuestruar celulari i pronarit Osman Kokoshi.
Me masë “detyrim paraqitje”:
8. Dition Pepa – masë “detyrim paraqitje”
9. •Kujtim Gjyla – masë “detyrim paraqitje”
I arrestuar në një vend të BE-së:
10. Franc Çopja
Sekuestrimet e kokainës
Gjatë hetimeve janë sekuestruar ngarkesa të mëdha me kokainë:
•Shtator 2020 – Anvers, Belgjikë:
11.6 ton kokainë e fshehur në kuti sapuni dhe boje metalike me logon “Fox”, nisur nga porti Villeta në Paraguaj. Gjatë një operacioni të mëvonshëm në Roterdam, u sekuestruan edhe 600 kg të tjera dhe 2 milionë euro.
•Dhjetor 2020 – Shkurt 2021 – Hamburg, Gjermani:
16.4 ton kokainë të fshehur në bombola metalike, të stampuara me logo si “sy me rrufe të kuqe”, “Puma”, “shenja infinit”. Vlera e tregut përllogaritet nga 1.5 miliardë deri në 3.5 miliardë euro.
Struktura dhe veprimtaria
Organizata kriminale ishte e udhëhequr nga shtetasit E.Ç. dhe F.G., të cilët jetonin në Paraguaj dhe kishin ndërtuar një strukturë të ndërlikuar të prodhimit, magazinimit dhe shpërndarjes së kokainës. Ngarkesat transportoheshin përmes porteve detare drejt Evropës, të maskuara si mallra të rregullta.
Grupi kishte ngritur gjithashtu një sistem të mirëfilltë qarkullimi dhe pastrimi parash. Paratë e fituara qarkullonin përmes transportit fizik nga BE drejt Shqipërisë, me anë të shoferëve të besuar të linjave të autobusëve ndërkombëtarë, të cilët përfitonin një komision prej rreth 2% të shumës së transportuar.
Përveç kësaj, përdorej edhe skema e njohur si “hawala”, që përfshin zinxhir ndërmjetësish pa lënë gjurmë bankare. Një pjesë e madhe e fondeve kanalizohej në Bolivi, për shkak të rregullave më të lira financiare.
Sekuestrimet e pronave dhe parave në Shqipëri
Me vendimin nr. 543 datë 07.08.2025, Gjykata e Posaçme vendosi sekuestrimin preventiv të 14 pasurive në pronësi të anëtarëve të grupit, përfshirë:
Resorte turistike:
•“Ajman PARK” Resort, Xhafzotaj, Durrës.
Vila dhe apartamente:
•Vilë dy katëshe në Dhërmi, Himarë, tip “ELYSIAN” – vlerë tregu afërsisht 1 milion euro.
•Vilë e porositur në Tiranë, me kontratë të datës 06.11.2024.
Toka dhe ndërtesa:
•Truall dhe ndërtesa në Sharrë, Tiranë.
•Pasuri me status të përkohshëm.
•Tokë arë 5900 m² në Sharrë, Tiranë.
•Pasuri në bashkëpronësi (nr. 349/45).
Shoqëri tregtare dhe aksione:
•Kuota në kompani në Kavajë, Durrës dhe Rrogozhinë.
Automjete:
•Tre automjete të sekuestruara.
Para të sekuestruara gjatë kontrolleve:
•111,800 euro
•4,000 USD
•880,000 lekë
Prokurorët Altin Dumani dhe Vladimir Mara e konsiderojnë këtë organizatë si një nga më të fuqishmet shqiptare që kanë operuar ndonjëherë në trafikun ndërkombëtar të kokainës.
Strukturimi, kapaciteti logjistik dhe qarkullimi masiv i parave i kanë dhënë asaj aftësinë për të ndikuar në çmimin e drogës në tregjet evropiane. /skyweb.al
