Instituti i Sigurimeve Shoqërore ka nisur një fushatë për t’u kërkuar përfituesve të pensioneve që të kalojnë marrjen e pagesave mujore nga sportelet postare në sistemin bankar.
Sipas një njoftimi të publikuar në rrjetet sociale, ISSH thotë se qëllimi është lehtësimi i procesit për qytetarët, shmangia e radhëve të gjata dhe garantimi i një shërbimi më të shpejtë, më të sigurt dhe më komod, veçanërisht për pensionistët e moshës së tretë.
Për të realizuar kalimin, qytetarët duhet të hapin një llogari bankare të dedikuar për marrjen e pensionit në njërën nga 10 bankat me të cilat ISSH ka marrëveshje bashkëpunimi.
Më pas, ata duhet të aplikojnë përmes portalit qeveritar e-Albania, duke përdorur shërbimin “Kërkesë për transferim dosjeje përfitimi”.
Ky proces konsiderohet një hap drejt modernizimit të sistemit të pagesave të pensioneve, duke rritur sigurinë dhe komoditetin për përfituesit, në përputhje me zhvillimet teknologjike dhe dixhitalizimin e shërbimeve publike.
Iniciativa mbështetet edhe nga Ligji për llogaritë bazike, i cili ka hyrë në fuqi në prill 2024 dhe synon të rrisë përfshirjen financiare të qytetarëve.
Ligji parashikon që kategori të caktuara përfitojnë shërbime bankare me tarifa të reduktuara ose zero, përfshirë hapjen dhe mbylljen e llogarive, tërheqjet në bankomate, pagesat online dhe transfertat e kreditit.
Aktualisht, sipas të dhënave të vitit të kaluar, rreth 74 mijë pensionistë e marrin pensionin nëpërmjet bankës, ndërsa mbi 666 mijë vazhdojnë të përdorin sportelet postare.
ISSH synon që përmes kësaj fushate, një pjesë e madhe e këtyre qytetarëve të kalojnë drejt përfitimit bankar, për të shmangur rradhët dhe për të përfituar nga lehtësitë e reja ligjore dhe teknologjike./skyweb.al
