Familjet që kanë të ardhura të ulëta dhe përballojnë me vështirësi kostot e energjisë pritet të mbështeten me pajisje të reja elektroshtëpiake, izolim të banesave dhe sisteme diellore. Masat janë pjesë e Planit Kombëtar të Veprimit për adresimin e varfërisë energjetike dhe mbrojtjen e klientëve në nevojë për periudhën 2026–2030.
Plani parashikon zëvendësimin e pajisjeve të vjetra që konsumojnë shumë energji përmes skemës “e vjetër për të re”.
Familjet mund të mbështeten gjithashtu për izolimin e mureve dhe çative, si dhe për ndërrimin e dritareve dhe dyerve të amortizuara. Një tjetër masë është zëvendësimi i sobave të vjetra me dru dhe pajisjeve joeficiente të ngrohjes me alternativa më ekonomike dhe më pak ndotëse.
Dokumenti i qeverisë, i konsultuar nga skyweb.al, parashikon edhe mbështetje për instalimin e paneleve fotovoltaike, që prodhojnë energji elektrike, ose kolektorëve diellorë për ngrohjen e ujit.
Përfitimi i këtyre masave nuk do të jetë automatik për çdo familje, por do të varet nga të ardhurat, konsumi i energjisë dhe gjendja e banesës.
Për këtë qëllim do të krijohet Regjistri Kombëtar i Varfërisë Energjetike, ku do të evidentohen familjet që kanë më shumë nevojë për mbështetje. Në vlerësim do të merret parasysh raporti mes faturave të energjisë dhe të ardhurave, zona klimatike, numri i fëmijëve, të moshuarve dhe personave me aftësi të kufizuara.
Përparësi pritet të kenë familjet që jetojnë në banesa të paizoluara, në zona të ftohta dhe shpenzojnë një pjesë të madhe të të ardhurave për ngrohje dhe energji.
Të dhënat e familjeve që marrin ndihmë ekonomike ose kompensim të energjisë do të përdoren për identifikimin e përfituesve.
Megjithatë, plani nuk përcakton ende shumën e financimit, numrin e familjeve që do të përfitojnë apo nëse ndërhyrjet do të mbulohen plotësisht nga shteti.
Nuk është përcaktuar gjithashtu data kur do të hapen aplikimet.
Gjatë vitit 2026 parashikohet ngritja e regjistrit dhe miratimi i metodologjisë për përcaktimin e familjeve në varfëri energjetike. /skyweb.al
