Apple ka publikuar listën e re të pajisjeve të shpallura të vjetruara sipas Forbes, duke paralajmëruar përdoruesit se disa modele iPhone nuk do të marrin më përditësime sigurie. Ky është një problem serioz, pasi mungesa e përditësimeve i ekspozon pajisjet ndaj sulmeve kibernetike dhe e bën telefonin gjithnjë e më të ngadaltë e të pasigurt.
Sipas Apple, kur një iPhone kalon në statusin “obsolete”, ai humbet çdo mbështetje teknike dhe ndalohet furnizimi me përditësime sigurie. Kjo krijon rrezikun që dobësitë e sistemit të keqpërdoren nga sulmuesit për të instaluar malware ose për të aksesuar të dhëna të ndjeshme si llogaritë bankare apo profilet online.
Modelet që Apple nuk i mbështet më
Në listën e re të pajisjeve të shpallura të vjetruara përfshihen, ndër të tjera, iPhone SE i gjeneratës së parë dhe linja iPhone 6s. Pajisjet e mëposhtme nuk marrin më përditësime dhe nuk riparohen nga Apple:
iPhone 3G, iPhone 3GS, iPhone 4 (të gjitha variantet), iPhone 4S, iPhone 5C, iPhone 5S, iPhone 6, iPhone 6 Plus, iPhone 6s (32GB), iPhone 6s Plus (32GB), iPhone SE.
Lista e pajisjeve “vintage”
Apple ka përditësuar edhe listën “vintage”, që përfshin pajisje që marrin në raste të rralla ndonjë patch sigurie dhe mund të riparohen, por me vështirësi për shkak të mungesës së pjesëve. Modelet më të reja që janë shtuar në këtë kategori janë iPhone X, iPhone XS, iPhone XS Max dhe iPhone 11 Pro Max.
Në këtë listë përfshihen gjithashtu iPhone 5, iPhone 6s (16/64/128GB), iPhone 6s Plus, seria iPhone 7, seria iPhone 8, iPhone X dhe modelet XS e 11 Pro Max.
Çfarë duhet të bëni nëse iPhone juaj është në listë
Hapi i parë është të verifikoni nëse pajisja juaj ndodhet në listën “obsolete”. Nëse po, rekomandohet zëvendësimi i saj, pasi mungesa e përditësimeve të sigurisë e lë telefonin të pambrojtur për çdo problem në të ardhmen.
Për pajisjet “vintage”, koha e përdorimit praktikisht po shkon drejt fundit, pasi mbështetja është e kufizuar dhe përditësimet mund të ndalen brenda një viti. /skyweb.al
