Një numër avionësh luftarakë gjermanë “Eurofighter Typhoon” u nisën sot nga baza ajrore Norvenich pranë Këlnit drejt bazës ajrore polake në Malbork, në juglindje të Gdanskut, për të forcuar krahun lindor të NATO-s.
Forcat Ajrore Gjermane njoftuan se ripozicionimi i avionëve përbën një përgjigje ndaj shkeljeve të fundit të hapësirës ajrore të NATO-s nga avionë rusë në rajonin e Baltikut, si edhe ndaj inkursioneve me dronë kamikazë.
Ministri gjerman i Mbrojtjes, Boris Pistorius, e kishte bërë publik vendimin në mes të tetorit. Dislokimi i avionëve “Eurofighter Typhoon” pritet të zgjasë deri në muajin mars.
“Me këtë mision, trupat tona po japin një kontribut të mëtejshëm të rëndësishëm në mbrojtjen e rajonit lindor të NATO-s, së bashku me krahun tonë të reagimit të shpejtë të vendosur në Rumani që nga gushti”, deklaroi komandanti i forcave ajrore, gjenerallejtënant Holger Neumann.
Avionët gjermanë u vendosën më herët në Malbork, rreth 60 kilometra në juglindje të Gdanskut dhe 80 kilometra në perëndim të enklavës ruse të Kaliningradit, gjatë muajve gusht dhe shtator.
Ata shoqërohen nga rreth 150 anëtarë personeli, përfshirë pilotë, teknikë, roje dhe policë ushtarakë. /skyweb.al
