Autoritetet koreano-jugore po zhvillojnë një aplikacion mobil që do t’u lejojë viktimave të përndjekjes të gjurmojnë në kohë reale vendndodhjen e përndjekësve të tyre, nëse ata ndodhen pranë.
Aplikacioni, i njoftuar të mërkurën nga ministria e drejtësisë, është pjesë e një ndryshimi të miratuar në ligjin për monitorimin elektronik, shkruan BBC.
Vitet e fundit, përndjekja është shndërruar në një shqetësim të madh publik në Korenë e Jugut, sidomos pas disa krimeve të profilit të lartë që kanë tronditur vendin.
Sipas ligjit aktual, viktimat marrin vetëm mesazhe paralajmëruese kur përndjekësi ndodhet afër, megjithatë pa marrë informacion të saktë mbi vendndodhjen e tij. Kjo e vështirëson orientimin dhe marrjen e masave të menjëhershme për siguri, tha ministria në një deklaratë.
Me ndryshimet e reja, viktimat do të jenë në gjendje të shohin në hartë pozicionin e përndjekësit përmes telefonit të tyre, duke u dhënë kohë të mjaftueshme për t’u larguar drejt një vendi të sigurt. Autoritetet përdorin pajisje elektronike të vendosura në trupin e përndjekësve për t’i gjurmuar ata.
Ministria e drejtësisë ka bërë të ditur gjithashtu se po punon për integrimin e këtij sistemi me linjën kombëtare të emergjencave, në mënyrë që policia të njoftohet menjëherë dhe të ndërhyjë për të mbrojtur viktimat. Sipas mediave lokale, ky integrim pritet të përfundojë vitin e ardhshëm.
Megjithatë, kritikët paralajmërojnë se fenomeni i përndjekjes është pjesë e një problemi më të gjerë të dhunës ndaj grave në Korenë e Jugut – shumë prej të cilave kanë qenë viktima të filmimeve të fshehta dhe kërcënimeve për shkak të aktivizmit feminist.
Në vitin 2022, vendi u trondit nga vrasja e një të reje nga ish-kolegu i saj, i cili e kishte përndjekur për vite me radhë. Edhe pse ajo e kishte raportuar në polici, ai nuk u arrestua dhe nuk iu vendos një urdhër mbrojtjeje, pasi autoritetet e konsideruan si “rrezik të ulët”.
Koreja e Jugut miratoi në vitin 2021 një ligj kundër përndjekjes, që parashikon deri në tre vjet burg dhe gjobë deri në 30 milionë won (rreth 20,400 dollarë). Në vitin 2023, parlamenti uli barrierat e ndjekjes penale ndaj përndjekësve.
Si rezultat, numri i rasteve të raportuara u rrit ndjeshëm, nga rreth 7,600 në vitin 2022 në më shumë se 13,000 vitin e kaluar, sipas të dhënave të ministrisë së drejtësisë. /skyweb.al
