Instituti i Statistikave ka publikuar raportin vjetor “Karakteristikat e Mjeteve Rrugore”, duke bërë me dije se në fund të vitit 2024 në Shqipëri ishin të regjistruara gjithsej 959.226 mjete rrugore, me një rritje prej 10,5% krahasuar me një vit më parë.
Nga këto, 80,8% janë autovetura, ndërsa numri i tyre për 1.000 banorë është rritur ndjeshëm, nga 292 në vitin 2023 në 328 në vitin 2024.
Qarku i Tiranës ka përqendrimin më të madh të mjeteve me 34,8%, i ndjekur nga Durrësi dhe Fieri. Ndërkohë, Durrësi kryeson për numrin më të lartë të autoveturave për banorë, me 483 mjete për çdo 1.000 banorë.
Raporti thekson gjithashtu disa karakteristika teknike të flotës rrugore: 58,8% e mjeteve kanë kambio manuale, ndërsa 44,4% janë të prodhuara pas vitit 2011, një tregues i rinovimit të pjesshëm të flotës.
Gjithsesi, 47,9% e autoveturave janë ende të vjetra, me moshë mes 11 dhe 20 vjet.
Në aspektin e markave, dominimi i Volkswagen dhe Mercedes-Benz mbetet i pandryshuar.
Sa i përket lëndës djegëse, 72,9% e autoveturave përdorin naftë, duke reflektuar ende një varësi të lartë nga derivatet klasike, pavarësisht tendencës në rritje për elektrifikim dhe përdorimin e alternativave më të pastra./skyweb.al
