Shqipëria mbetet e vendosur të forcojë bashkëpunimin me Maqedoninë e Veriut si dy fqinje mike, partnere të besueshme dhe aleate në NATO, me synim integrimin në Bashkimin Evropian dhe me kontribut thelbësor të faktorit shtetformues shqiptar që jeton atje.
Këtë qëndrim e rikonfirmoi Presidenti i Republikës, Bajram Begaj, gjatë vizitës zyrtare në Republikën e Maqedonisë së Veriut, ku u prit me ceremoni solemne nga Presidentja Gordana Siljanovska-Davkova.
Krerët e dy shteteve zhvilluan fillimisht një takim kokë më kokë dhe më pas bisedime në praninë e delegacioneve përkatëse. Në konferencën e përbashkët për mediat, Presidenti Begaj bëri të ditura konkluzionet e takimit, ku një vend të rëndësishëm zuri roli i faktorit shqiptar në Maqedoninë e Veriut.
“Faktori shqiptar në Maqedoninë e Veriut ka qenë, është dhe do të vijojë të jetë një faktor shtetformues, bashkëpunues, përfshirës, konstruktiv dhe demokratik, me kontribut kyç në avancimin euroatlantik”, u shpreh Kreu i Shtetit.
Presidenti vlerësoi përpjekjet për ndërtimin e një shoqërie funksionale multietnike përmes zbatimit të plotë të Marrëveshjes Kornizë të Ohrit, duke riafirmuar qëndrimin e Shqipërisë për respektimin e detyrimeve që burojnë prej saj.
Gjatë bisedimeve u diskutua gjithashtu edhe avancimi i projektit strategjik të Korridorit VIII, për të cilin Begaj theksoi nevojën e konsolidimit të bashkëpunimit, duke e cilësuar këtë korridor si një flamurshenjë të integrimit rajonal dhe zhvillimit të qëndrueshëm.
Vizita i kushtoi rëndësi të veçantë edhe thellimit të bashkëpunimit në fushën akademike dhe atë të arsimit. Presidenti Begaj siguroi se Shqipëria mbetet e angazhuar për forcimin e bashkëpunimit politik, ekonomik dhe shoqëror, si edhe për promovimin e fqinjësisë së mirë dhe dialogut në Ballkanin Perëndimor, elementë thelbësorë për procesin e anëtarësimit në Bashkimin Evropian.
