Qeveria ka shpallur krijimin e zonës së re të teknologjisë dhe zhvillimit ekonomik “VLORË TEDA/RAMS FREE ZONE” në Bashkinë Vlorë.
Projekti do të shtrihet në një sipërfaqe prej 885 mijë metrash katrorë, ose rreth 88.5 hektarësh, në zonat kadastrale 8604 dhe 2765.
Bëhet fjalë për pasuri të paluajtshme shtetërore, të cilat do të vihen në dispozicion të projektit nga Ministria e Ekonomisë dhe Inovacionit. Tarifa e përcaktuar është simbolike, vetëm 1 euro për kontratën.
Zhvillues i zonës është shpallur shoqëria “RAMS ALBANIA”, e përzgjedhur pa garë, përmes një procedure jokonkurruese. Kompania ka marrë statusin “Investim/investitor, procedurë e veçantë”, me vendim të Komitetit të Investimeve Strategjike.
Zona ekonomike do të funksionojë për 35 vjet, ndërsa vendimi parashikon mundësinë e zgjatjes së afatit deri në 99 vjet. Në këtë territor pritet të ndërtohet një ekosistem industrial, logjistik dhe inovativ.
Aktivitetet do të përfshijnë teknologjinë industriale, automatizimin dhe inteligjencën artificiale.
Parashikohet gjithashtu përpunimi i lehtë mekanik i metaleve, metalurgjia e pastër dhe trajtimet sipërfaqësore jondotëse.
Në zonë do të lejohen edhe investime në sektorin e energjisë së rinovueshme.
Vendimi përcakton se kufijtë, shtrirja dhe pikat e hyrjes e daljes do të jenë sipas hartës që shoqëron projektin.
Me miratimin e zonës së re shfuqizohen vendimet e vitit 2008 për zonën ekonomike dhe parkun e mëparshëm industrial të Vlorës.
