Numri i shtetasve të huaj që kanë hyrë në Shqipëri gjatë muajit maj 2026 ka njohur një rritje të konsiderueshme, duke pasqyruar fillimin e sezonit turistik dhe shtimin e interesit për të vizituar vendin.
Sipas të dhënave të publikuara nga Instituti i Statistikave (INSTAT), gjatë muajit maj janë regjistruar 1.143.595 hyrje të shtetasve të huaj në territorin shqiptar, ose 15,9% më shumë krahasuar me të njëjtin muaj të vitit 2025.
Në total, hyrjet e shtetasve shqiptarë dhe të huaj kanë arritur në 1.880.161, duke u rritur me 12,2% në bazë vjetore. Ndërkohë, numri i daljeve nga vendi ka shkuar në 1.802.626, me një rritje prej 8,9%.
Gjatë kësaj periudhe, hyrjet e shtetasve shqiptarë janë llogaritur në 736.566, ndërsa daljet në 735.795. Krahasuar me një vit më parë, hyrjet janë rritur me 6,9%, ndërsa daljet me 3,6%.
Të dhënat e INSTAT tregojnë se pjesa më e madhe e vizitorëve të huaj vijnë nga Evropa Jugore, e cila përfaqëson 70% të totalit të hyrjeve, ndërsa 12% e tyre vijnë nga Evropa Perëndimore.
Pothuajse të gjitha hyrjet e shtetasve të huaj, rreth 98%, janë realizuar për arsye personale, ndërsa udhëtimet për biznes dhe qëllime profesionale kanë pësuar një rënie prej 5,6% krahasuar me majin e vitit të kaluar.
Në pesë muajt e parë të vitit 2026, Shqipëria ka regjistruar një rritje prej 8,2% të hyrjeve të shtetasve të huaj, duke konfirmuar trendin pozitiv të flukseve turistike dhe lëvizjeve ndërkombëtare drejt vendit.
